Page 2 - POST ARUBA 3 OCT 2015

16 AWEMainta Diasabra, 3 Oktober 2015

Dor di preveni cachonan brabo los
pafo di cura

Comunidad ta yuda
Post Aruba N.V.
brinda miho servicio

Postbus cu number di cas riba dje
ta ideal

POST ARUBA N.V. ta rib’un trayecto nobo di aumenta

productividad y ofrece clientenan mas y miho servicio.
Den nan afan pa por ta mas lihe den entrega di post y
pakinan, ta confrontando reto ora hiba carta of paki
na casnan cu tin cacho los of pa drenta cayanan cu tin
cantidad di cachonan los pafo di cura. Comunidad por
duna un man den esaki, pa yuda e partidonan di carta
brinda un miho servicio na clientenan.

Post Aruba N.V. ta haci uzo di scooters pa parti carta,
pa haci e trabou mas facil y lihe. Sinembargo cacho los
riba caya of cacho den cura cu ta yega cerca di e postbus
ta forma un peliger p’e trahadonan. Constantemente
cachonan ta ataca partidonan di carta di Post Aruba N.V.
ora nan ta core den bario haciendo nan trabou.
Tin biaha nan no por parti carta na cierto adres of bario
pasobra tin cacho mara n’e post bus of los riba caya cual
no ta laga e trahadonan ni drenta den e caya. Tambe
tin casnan cu tin postbus, pero esaki no ta poni na un
luga cu ta facil pa yega na dje. Y esaki ta haci trabou di
e partido di carta hopi dificil.

P’e motibonan aki Post Aruba ta haci un apelacion na
comunidad pa tene cachonan den cura di cas y pone un
postbus (si bo no tin) na un luga caminda e partidonan
di carta por yega facil na dje. Ta ideal pa pone number
di cas rib’e postbus pa asina evita confusion y eror
innecesario. Esaki ta facilita trabou di partidonan di
carta inmensamente y lo proteha e corespondencia di
awasero y e mesun cacho cu por mord’e y kibr’e.
Dia 24 di augustus 2005 a funda e compania priva
Post Aruba N.V., cu antes tabata un departamento di
Gobierno. Su oficina principal ta situa na J.E. Irausquin
Plein # 9 na Oranjestad y tin 3 oficina adicional na
Santa Cruz, Noord y San Nicolas. Ey ta ofrece tur tipo di
servicio, for di manda un envelop, te na carga pisa, sin
lubida nan servicio di manda placa via Western Union.

Post Aruba N.V. ta conta cu 111 empleado, cu diariamente
ta yega na 42 mil adres situa tur rond di nos isla. Mas
cu djis un servicio, e empleadonan atento ta percura pa
tanto comunidad como sector comercial por comunica
cu otro.

Pa mas informacion riba servicionan di Post Aruba N.V.,
bishita e website www.postaruba.com of check nan
paginanan riba Facebook, cu ta E-Post Aruba y Aruba
Stamps.