Page 14 - AWEMAINTA

14 AWEMainta Diaranson, 23 Mei 2018

Cumpliendo cu transparencia:
Partido MEP cu reunion informativo na cede di MEP

Nos lo sigui informa pueblo cu e berdad y realidad

PARTIDO MEP, dialuna anochi a tene un
reunion informativo den bario di Santa Cruz.
Cede di MEP tabata yen na unda a nota cu tin
hopi interes den pueblo p’e informacion cu MEP
ta trece padilanti.
P’e motibo aki tambe MEP lo sigui informa
pueblo cu e berdad y realidad. Di e manera aki,
Partido MEP ta cumpli cu transparencia.

E reunion na cede di MEP tabata impactante
na unda e interes a surpasa tur expectativa. Un
publico grandi a presencia e reunion aki. Y a
haya e oportunidad pa haci pregunta y trece nan
preocupacion padilanti.
Un di e preocupacionnan di mas grandi t’e
debe cu Aruba ta den. Integrantenan di MEP a
contesta tur pregunta y a comparti informacion
importante di e desaroyonan den nos comunidad
como tambe den Gobierno.
Ta importante pa pueblo comprende cu e crisis
financiero cu Aruba t’aden aworaki ta un crisis
traha pa Mike Eman y partido AVP.

Cu MEP awor den Gobierno, e prioridad ta
pa sanea e situacion financiero di nos pais
pa asina laga un Aruba na unda por tin un
desaroyo economico structural p’e siguiente
generacionnan.
Lamentablemente no ta tur persona por a haya
oportunidad pa haci pregunta of trece nan
preocupacion dilanti publicamente.
Sinembargo despues di a sera e reunion, e
publico a acerca e candidatonan di MEP p’asina
personalmente haci nan pregunta y papia di nan
inkietudnan cu nan tin pa cu e pais.

E reunionnan informativo lo continua den
diferente bario di Aruba. Keda pendiente pa mas
informacion tocante e proximo fecha y lugar.