Page 39 - HOH

Awe autoridad Mericano ta pidi su ciudadanonan, sigur mayor di edad of cu problema di
salud, pa no biaha.

Kico esaki ta encera pa Aruba? E expresion mas importante contra e base economico di

Aruba, cu ta turismo.

Aruba ta drenta un siman den cual e preguntanan haci dor di e matutino di pueblo di
Aruba, DIARIO, ta haya forsa.

En corte, nos mester resumi nos ponencianan cu e pregunta si Aruba por bay cubri tur
e resultadonan di e coronavirus nobo, cu ta un calamidad.

Economia di Aruba diripiente ta den un situacion di crisis. No tin ningun siguridad cu
turistanan cu a bisa cu nan ta biaha pa Aruba, lo realisa nan biahe.

Di tur parti di mundo tin informacion cu paisnan grandi ta pone nan mannan na cabes

enfrente e perdidanan cu nan ta sufri.

Aruba tin placa pa tur loke lo pasa? Na cuanto ocasion DIARIO no a subraya cu forsa,
cu e falta di creacion di un reserva tempo a introduci proyectonan cu no tabata

necesario, awe ta presenta su mes?

Con Aruba ta bay atende cu e realidad, cu pa un temporada trabou na Aruba ta bay
enfrenta un crisis? Con grandi e crisis lo bira, ningun hende por bisa.

Esaki ta momentonan cu semper mester a planea y pa cual semper mester a reserva
placa pa fondonan di emergencia.

Empresanan na Aruba ta cubri pa loke ta pasa? Hopi compania di seguro siman pasa a
mustra cu empresanan rond mundo no a sigura nan mes contra epidemia.

Kico sindicatonan ta haci? Mester lansa e pregunta pasobra awor na tur nivel y den

organisacion lidernan mester bini dilanti pa bisa con nan ta prepara.

Kico Banco Central ta pronostica pa e moneda? Lo bini un recesion cu por afecta
moneda?