Page 21 - MIN ON 28 JUNE 2017

KATHERINE MULLER-MARIN DI UNESCO A

BISHTA PROME MINISTER MIKE EMAN

June 27, 2017 Admin Uncategorized Leave a comment

ORANJESTAD- Den oranan di diabierna atardi un delegacion di UNESCO a topa
cu Prome Minister di Aruba Mike Eman, relaciona cu un bisita di sra. Katherine
Muller-Marin, kende ta directora di oficina regional di UNESCO pa
Caribe y Latino America. Durante e bishita e delegacion di
UNESCO tabata consisti di sra. Zetsia Ponson, secretario general, sr.Luc Alofs
president di e NatCom di Aruba y sr. Marck Oduber, liaison cientifico di NatCom
Aruba. Durante e reunion a dialoga riba diferente punto cu UNESCO por yuda
Aruba cu nan. Durante e siman di 19 pa 23 di juni 2017 UNESCO a sinta cu
diferente departamento di Gobierno y algun NGO’s. UNESCO su team dinamico
na Aruba, kier haci uso maximo di UNESCO internacional pa asina Aruba por saca
maximo probecho di tur locual UNESCO mundialmente ta ofrece. UNESCO tin
diferente ramo di atencion cu ta inclui Enseñansa, Ciencia natural, Ciencia
social, Cultura, Comunicacion y Informacion. Un di e metanan principal di
nan bishita ta pa traha riba un plan di termino mediano pa UNESCO Aruba den
cuadro di implementacion di e 17 metanan di desaroyo sostenibel.

Un proyecto grandi cu ta trahando riba cu diferente departamento concerni y cu
a hala hopi atencion di Prome Minister ta e proyecto “Multi-hazard Early Warning
System” pa Aruba unda cu lo bay bin cu un risico analyse nobo, por ehempel pa
sismo, unda cu tambe lo bay analisa y recomenda riba e structuranan di
importancia, por ehempel scolnan, pasobra alumnonan ta pasa gran parti di
dia na scol. Tambe den e proyecto lo enfoca riba educacion di riesgo, mitigacion
di disaster y reaccion durante un desaster. Desaroyo di capacidad pa
e departamentonan concerni pa logra e meta tambe lo wordo inclui.
E proyecto aki lo wordo dirigi pa sr. Marck Oduber como liaison di
ciencia y punto focal di tsunami y IOC/UNESCO.

Pa UNESCO Aruba logra cumpli cu tur su metanan describi den plan di
termino mediano, lo bay busca cooperacion entre diferente comision regional di
UNESCO y Hulanda. Esaki en especial durante e reunion grandi “39th Session of
the General Conference of UNESCO” nacomienso di november na Paris.