Page 90 - MIN VOS AUG 28

14 AWEMainta Diabierna, 28 Augustus 2015

Un dialogo special
tocante tribonnan
na Aruba

DIASABRA ultimo 22 di augustus a tuma lugar un

dialogo hopi special na Parke Nacional Arikok cu piscador,
sambuyadornan y publico en general.
Prome cu e dialogo e invitadonan por a wak un documentario
cortico, yama “Sharks Demystified” cu ta bay over di e
percepcionnan di piscador, sambuyador y expertonan riba e
tema di tribonnan n’e islanan St. Maarten, St. Eustasius y Saba.

Ademas na mesun momento Parke Nacional Arikok a habri
e exposición di Tribon n’e centro di bishita, unda por wak
diferente obra di arte, boca di tribon y material educativo.
E dialogo a dura dos ora largo unda e invitadonan a responde
riba preguntanan di srta. Tatiana Becker, coordinador local
di Aruba su “Sharkweek” y e proyecto di “Salba nos tribon”.
Algun ehempel di preguntanan tabata: Ki tipo di tribon bo
sa wak na Aruba? Unda bo lo por wak nan mas frecuente?
Tin un cambio den e cantidad di tribonnan? Ki bo ta opina di
tribon? Ki t’e función di un tribon? Di ki forma mester proteha
nos tribonnan?

Ademas Tatiana Becker a mustra cua tribonnan ta proteha
na Aruba via e convención di CITES. Nan ta e.o., Scalloped
Hammerhead, Smooth Heamerhead, Great Hammerhead,
Oceanic White Tip Shark, Whale Shark, Basking Shark y
Manta Rayanan (cu no ta tribon, pero si bao di e mesun clase
cu tribon).
Danki na un dialogo habri sin husgamento por a saca hopi
informacion valioso pa comprende con pa cuminsa conserva
nos populacionnan di tribon na Aruba.
For di e combersación habri a haya sa entre otro: Cu e tribonnan
mas frecuentemente topa ta Nursesharks, Tigersharks,
Bullsharks leu a leu Threshersharks, Lemonsharks,
Hammerheads, Mako, Whale Sharks y Reefsharks mayoria
tribon ta topa na Noordkust.
Cu antes tabatin mas Hammerheads y nan tabata drenta den
lagoen pa werp cu falta educación y información directo pa
piscadornan tocante cua tribonnan no mag wordo pisca,
cu mester di educación tocante tribon di chikito caba cu si
piscadornan ta haya cu mester proteha tribon, pero no di un
forma cu ta castiga piscador cu a gara tribon sin intención di
gar’e cu ta tempo pa Aruba tuma por lo menos un stap dilanti
den proteha nos medio ambiente.

Protección riba tera ta esencial tambe pa proteha bida na lama
cu piscamento excesivo, piscamento iresponsabel, cambio
climático y polucion ta menaza nos rifnan cu un Parke Marino
lo beneficia Aruba su tribonnan y piscaderia.
Asina a lansa e siman di “Sharkweek” y a mustra un tiki
speransa p’e futuro di nos tribonnan.
Si bo ta un piscador of sambuyador y bo sa wak tribon, por
fabor tuma contacto cu Tatiana Becker na 562 9348 y asina
yuda amplia e información di tribon na Aruba.