Page 15 - MIN ECEM

Minister Mike de Meza: Pronto dump di Parkietenbos no lo
bay wordo uza mas

Thursday, 15 June 2017 08:38
Comparti

Atrobe tabata tin vlamnan grandi di candela riba tereno di dump na Parkietenbos. Ta candela cu ta
intensional y cu bomberonan a presenta y hasta polis. Pero nan no a paga e candela, pasobra e candela no
ta un molester pa habitantenan. E ta bay lama.

Nan no ta sinti cu nan tin cu inverti awa y tambe ekipo pa paga e candela aki. Si resulta cu e bira un
problema pa e habitantenan cu biento bira, mesora nan lo tey pa bay den accion. Minister Mike de Meza,
ta responsabel pa medio ambiente y tambe cu dump. El a mustra interes mesora pa bin atende cu e
situacion. E pregunta ta kico lo bay sosode cu dump. E ta conta con Gobierno ta analisa e situacion.
Segun e ta comenta, cu ta un situacion hopi fastioso. E vlamnan tabata hopi mas grandi si. Tipo di
vlamnan aki, ora cu mir’e, bo ta mira e huma preto cu ta causa daño sigur na nos medio ambiente y e no
ta algo responsabel. Esaki pa e minister, no por mas. Gobierno a purba den pasado, bao di difente
signatura di Gobierno pa bin cu un solucion. E no ta uno facil tampoco, e minister a comenta. Si mira na
Corsou, na St. Maarten, Venezuela, Colombia. Paisnan cu tin miyones di hende, pero na Merca tambe, na
Europa tambe, Hulanda mes, ainda ta existi den tur e luganan aki un landfill. E rason cu a trece ariba ta
pa mustra cu e no ta mes facil cu hopi hende ta kere. Bo bin cu tecnologia nobo, bo mester bin cu nan y
nan mester prueba nan mes, cu e no ta facil. Ta mira por ehempel na Hulanda, unda cu el a bishita algun
luga cu tin sistemanan sofistica. Pero pa por haci e trabao eynan cu nan ta haci e trabao ey cu nan ta haci,
ora cu convirti’e, den kico ta costabo por ehempel pa bo haci esey. E ta costabo entre 350 pa 500 florin pa
ton, cu ta sumamente caro.

E calculacionnan aki hopi biaha ta wordo calcula riba 60 florin pa ton, e ta bisabo cu bo no por yega na
inverti asina tanto placa pasobra bo no tin’e na entrada. Ta lastima cu no ta mucho tempo atras, nos
Gobierno a bin locual cu a wordo poni den ley, bao di e Gobierno anterior mes, cu mester bay cobra pa
Serlimar. Por tin suficiente fondo cu por haci e trabao mas responsabel ainda. Si mira, por a corda cu
tabata tin sindicatonan bisa cu pa pueblo no paga esaki y e candela ta e consecuencia di dje. E pagadonan
di e 25 florin mensualmente pa Serlimar recoge tur e desperdicio na cas, cu nan por tin un proceso cu ta
pagabel, pa por haci esaki riba un manera mas responsabel awe na 2017. Ta mira di locual cu tin di
compronde cu e comportacion di pago, ta mas of menos 10%. Cu e placa ey bo no por haci mucho cos. E
ora bo ta haya situacionnan cu pa mas di 30 aña caba. A papia siman pasa cu e asociacion di e
ciudadanonan di Parkietenbos. A sinta cu nan. E minister tabata tin hopi simpatia pa nan ora cu nan a
bisa cu nan no por sigui biba den un medio ambiente asina. A splica nan kico tur a transcuri durante
añanan largo, bao di diferente signatura di Gobierno. E retonan cu tin pa e problema aki. Den pasado no
tabata tin mucho hende cu tabata preocupa pa e situacion. Nan ta contento, tin un dump y ta dump tur
cos eynan. Awor aki e luga a satura y no por sigui. Un biaha mas, por a mira locual cu ta pasando y ta
inacceptabel. No por tolera esaki mas. Ya ta basta tempo cu ta trahando riba un solucion real, sostenibel,
cu sa cu lo por ehecuta riba un manera responsabel y awor aki por a mira cu tin cu bay acelera esaki mas
ainda.