Page 8 - MIN ECEM

Dentro di algun siman e dump aki no lo mira e operacion cu e
tabata mira pa mas cu 30 aña caba

Thursday, 15 June 2017 08:41
Comparti

Minister de Meza a papia cu prome minister Mike Eman. El a papia cu su otro colega Benny Sevinger,
kende ta encarga cu Serlimar. A papia cu otro personanan den e comision aki y a laga nan sa cu de Meza
lo anuncia cu dentro di algun siman e dump aki no lo bay wordo uza mas.

Ta baha cada biaha mas y mas e uzo di e dump y ta bay e ora deactiva e luga. Tin algun luga cu ta
studiando. Ta bay acelera esaki y ta bay crea un luga nobo caminda e operacion tin cu bay tuma luga y
riba un manera serio. Den e situacion urgente aki no lo tin tur e aparaturanan cu nan mester, pero lo haci
uzo di locual cu tin na Aruba na nan alcanse, di un forma of otro. Pero e operacion aki no por sigui. Como
minister di medio ambiente y responsabel pa Parkietenbos, de Meza a bisa cu dentro di algun siman e
dump aki no lo mira e operacion cu e tabata mira, pa mas cu 30 aña caba. Pronto lo anuncia unda e
operacion lo sigui, con e operacion lo sigui, kico lo ta e plan a corto plazo, mediano y largo. Pero esaki no
ta bay sigui. Esaki no ta corecto. Ora e biento bolter, ta ser humano, Arubianonan ta biba aki, cu a deal cu
e situacion pa basta aña. Tin di compronde cu tin diferente habitante, banda di Parkietenbos cu a bira
malo, ta sufri di asma, ta sufri di otro malesanan cu tin di haber cu e consecuencianan di e dump aki. Tin
cu haci algo cu nos desperdicio. Pero no por sigui den e forma aki. Sa cu hopi biaha ta haya situacion cu e
ta wordo cendi intensionalmente door di diferente tipo di persona. E minister sa tambe cu e trahadonan
di Serlimar ta haci nan esfuerso maximo pa haci nan trabao eynan. Nan ta haci un trabao cu e minister
tin admiracion pa nan. No ta un ambiente facil pa traha den dje, pero pa nan tambe no ta algo
responsabel pa sigui den e forma aki. Den algun siman, lo bin ta baha e produccion, e proceso aki hopi
lihe y ta bay uza diferente luga y haci’e na diferente manera. Ya pa awe, diahuebs, a notifica e manager di
Serlimar kende tin e responsabilidad di e dump. A papia cun’e, cu diahuebs pa 2’or, si tur cos ta bon, ta
sinta cun’e, hunto cu director di Serlimar tambe y ta cuminsa acelera e proceso cu a discuti. Siman pasa a
sinta cu gerente di Serlimar, papiando riba e diferente opcionnan cu ta studiando, pero locual cu tin
eynan, no ta responsabel. No ta corecto tampoco pa sigui den esaki. Ta solucionnan costoso. Tin cu bin
cu manera cu por carga e costo aki conhuntamentecu pueblo di Aruba, pasobra na fin di dia, no ta
Gobierno ta esun so cu ta genera desperdicio, pero tur hende. Comercio en general, sector hotelero
tambe, pero parti residencial tambe, tur hunto ta genera desperdicio. Tur hunto tin cu carga esaki tambe.
E ta un responsabilidad di nos tur. Wanta Aruba limpi ta di nos tur e ta y tambe deal cu nos situacion di
desperdicio. Na fin di dia, nos tin cu carg’e hunto y nos tin cu carga e gastonan cu esaki ta trece cun’e,
pasobra ta un desperdicio cu nos tur ta responsabel pe.