Page 8 - DIGICEL

2 AWEMainta Diabierna, 18 Mei 2018

Aparentemente MinHus mr, Andin Bikker no gusta pa prensa sigui actividadnan policial
Tin investigacion interno andando pa haya sa con tin prensa

cu ta na altura di tur suceso

APARENTEMENTE Minister di Husticia, mr Andin Bikker no ta di acuerdo
p’e forma cu tin medionan di comunicacion ta sigui noticianan policial. Pesey,
el a dicidi di institui un investigacion pa determina, con por ta posible cu tin
reporteronan tin facilidad pa sa di tur suceso cu ta tuma lugar na Aruba.

E mandatario ta duna e impresion cu e no ta di acuerdo cu miembronan di

prensa sa mucho liher loke ta tumando lugar, pero e ta duna e impresion tambe,
cu e mandatario kier silencia prensa, pa stop di e.o. publica cuanto atraco tin te
cu awor.
Minister Bikker no kier comenta riba e investigacion interno aki, pasobra e
por ta contraproductivo. E mandatario mester por sa, cu ki novedad tin den
tecnologia, inmediatamente su tras di “experto’ ta crea e posibilidad pa nada
keda secreto.
Si Minister Andin Bikker ta kere cu lo tin miembro di prensa lo por tin un radio
di polis, t’asina cu tur radio actualmente tin un GPS y como tal por sa unda
dicho radio ta.
Pero awendia, hasta bao di Polisnan tin un sistema di chat, den cual tin miembro
di prensa envolvi, pasobra hopi biaha Polis tambe ta depende di prensa pa yuda

soluciona un of otro caso. Awor e titular di husticia no kier esaki mas? Anto
bis’e!!!

Consumidornan rabia cu SETAR

AWEMAINTA a haya diferente yamada y comentario di
consumidornan kendenan a expresa di ta rabia cu e compania nacional di
telecomunicacion, mas ainda riba e dia di ayera cu ta Dia Internacional
di Telecomunicacion.
Diamars ultimo, un dia prome cu celebracion di e fecha aki, un accidente
realisa door di un compania di construccion riba e proyecto di Watty
Vos Boulevard, a causa daño na e cablenan di SETAR den area di unda
antes tabata Texas. Esaki ta informacion cu, e ciudadanonan ta bisa,
nan a tende rond. Sinembargo di parti di SETAR mes nan no a haya
ningun informacion oficial di kico tabata e problema cu algun mil
persona a sufri un caida di Internet y Cable pa mas di 12 ora. E areanan
afecta ta for di aeropuerto bay ariba. AWEMainta a splica diferente di
e personanan cu riba Facebook tabatin un post di SETAR bisando kico
a pasa. Sinembargo esaki no a convence e ciudadanonan, di cual algun
ta bisa cu nan ta preocupa cu Facebook mes, y ta prefera di por a lesa
esaki den corantnan of scucha un hende di SETAR na radio dunando un
splicacion di kico a pasa y duna nan disculpa, apesar cu den e caso aki
no ta nan culpa. “SETAR probablemente por pidi compensacion pa daño
sufri, perdida di entrada. Pero kico ta wordo ofreci na e ciudadanonan
cu pa 12 ora largo a wordo prevee di haya acceso na Internet y Cable,”:
un di e ciudadanonan a puntra.