Page 17 - AM211023

17 AWEMainta .com Diasabra, 23 October 2021

UN SNECHI DI PALABRA DI DIOS

XXX DIADOMINGO DEN AÑA 24.10.21 #334

DIADOMINGO DI MISION

I lectura: Yer. 31, 7-9

Salmo 126

II lectura: Heb. 5, 1-6

Evangelio: Mc. 10, 46-52

Un dia Hesus tabata sali for di Jericho; su discipelnan y un multitud grandi tabata siguiE. Un homber ciego, yama
Bartimeo, yiu di Timeo, tabata sinta canto di caminda ta pidi limosna. Ora Bartimeo a tende cu tabata Hesus di
Nazaret, el a cuminsa grita: “Hesus, Yiu di David, tene misericordia di mi!” Hopi hende a raus e bis’e keda keto, ma el
a grita mas duro ainda: “Yiu di David, tene misericordia di mi!” Hesus a keda para y bisa: “Yam’e pa Mi.” E hendenan
a yama e ciego y bis’e: “Animo! Lanta riba! E ta yama bo!” E ciego a tira su mantel un banda, bula lanta y bay cerca
Hesus. Hesus a puntr’e: “Kico bo kier pa Mi haci pa bo?” Bartimeo a contesta: “Maestro, haci mi mira atrobe.” Hesus
a bis’e: “Bay numa. Bo fe den Mi a salba bo!” Mesora e ciego Bartimeo a mira atrobe y el a sigui tras di Hesus.

Palabra di Señor.

MENSAHE
Canto di caminda tabata sinta un ciego yama Bartimeo.

Bartimeo ta representa un grupo masha amplio di hende:
hende pober, sufriente, solitario, margina, exclui.

Hende cu a perde speransa, cu no ta mira ningun solucion pa nan problemanan. P’esey tambe e hende aki ta biba
dependiente di otro. Igual cu e ciego Bartimeo nan ta pidi limosna y compasion. Nan no ta pidi solamente co’i come,
bebe of un paña pa bisti, pero ta pidi aceptacion den comunidad, respet, afecto y amor. Den cierto grado nos tur ta
limosnero di amor, pasobra sin amor nos ta sinti nos mes solitario, pober, bashi.

Bartimeo como ciego ta representa tambe tur esnan cu den nan cieguedad ta tuma tur cos cu hende duna nan.
Tanto cos bon como tambe malo.

Ta simbolisa tambe tur esnan cu ta biba den scuridad di nan propio egoismo. Esnan cera pa otro. Un bida asina ta
un miseria. Danki Dios, Bartimeo ta desea otro bida y e ta kere cu Hesus por yud’e den esey. P’esey tambe ora el a
tende cu Hesus ta pasa, e no a perde e oportunidad. E ta grita pa haya atencion di Hesus. Lamentablemente, den su
bisindario tin hende cu kier impedi su encuentro cu Hesus. Kisas mescos ta pasa den nos bisindario, kisas nos mes
ta stroba otro pa yega cerca Hesus. Pero danki Dios cerca di Bartimeo tin esnan cu a yud’e realisa e encuentro aki.

Rumannan! GRITO di Bartimeo: “Yiu di David, tene misericordia di mi!”, expresa den e forma di ripiticion, ta manera
un oracion masha bunita, cu ta siña nos con nos mester resa. Su oracion ta perseverante, e ta sali for di e fondo di
su curason, anto e ta expresa fe den bondad y forsa di Hesus. P’esey tambe e por a scucha e palabranan di Hesus:
“Bo fe den Mi a salba bo!” Anto el a recupera su bista.

Rumannan! Den tur instante di nos bida y mas tanto den momentonan di sufrimento, debilidad, problema nos mester
resa manera Bartimeo. Haci un GRITO DI FE.

Hesus no ta resisti un pober cu ta yam’e den su miseria, si e ta hacie di curason y cu hopi fe.

ORACION
Señor! Tene misericordia di mi. Cura mi cieguedad pa mi mira cla cua ta e caminda cu mi mester sigui y no cay den
trampanan di scuridad di mundo.
PROPOSITO

Intensifica bo oracion.