Page 3 - AM211023

Diasabra, 23 October 2021
Corte a duna castigo pisa
Pa grupo di hoben cu a comete varios
atraco den un luna di tempo
Corte den Prome Instancia tabata bon cla den su
sentencia contra un grupo di hoben cu a comete
varios atraco usando arma di candela y cuchiu,
caminda no a acepta cu abogadonan defensor a
solicita p’e grupo di hoben aki, bin na remarca pa
wordo husga como acusudornan hubenil.
E grupo aki den un lapso di un luna cuminsando na
februari di e aña aki, a terorisa cantidad di hende cu
nan acto cu ta algo sumamente serio.
Huez a mustra cu a base di un raport di Departamento
di Reclassering, esaki a conseha p’e mucha homber
aki ricibi guía extenso pa trata di cambia su actitud
y asina evita cu den futuro e lo sigui riba mesun
caminda malo aki.
Corte a dicidi den e caso aki cu e hoben aki di 15 aña
lo haya un castigo di prison di un aña di cual tres
luna lo ta condiciona cu tempo di prueba di dos aña,
pues e lo tin cu sinta un castigo di 9 luna den prison
y despues e lo wordo pone bou guía di Reclassering.
Pa loke tabata e otro acusadnonan aki ta trata di
dos hoben di 18 aña, uno di 19 aña y otro homber
di 25 aña, kendenan tur a wordo haya culpabel di e
comete e actonan criminal aki y na mes momento a
rechasa peticion di abogadonan p’e dosnan di 18 y
esun di 19 aña, wordo considera como hubenilnan
pa Corte.
Hues a mustra bon cla cu no tin ningun motibo pa
considera e tresnan aki como acusadonan hubenil
sigur mirando e efecto grandi cu e actonan aki
tabatin riba comunidad, causando cu comunidad a
biba momentonan di incomodidad cu tur e actonan
aki cu nan a comete.
No solamente esey, pero na mes momento Hues a
considera cu e grupo aki a haci daño tambe na e
imagen di e isla cu ta conta practicamente riba e
industria turistico, mientras cu e victimanan cu a
pasa den e actonan criminal aki, lo por keda afecta
pa hopi tempo.
Ta trata di un grupo cu Corte a considera cu
ningun momento nan a realisa riba e daño grandi
cu nan ta cometiendo pa yega na placa facil y e
consecuencianan di esaki tabata inmenso.
AWEMainta.com 3
E hoben J.B. di 18 aña a wordo haya culpabel di a
participa den cinco asalto arma y tambe culpabel di
tabata den posecion di arma di candela y den su caso
Hues a condena e hoben aki na 4 aña di prison di cual
ocho luna ta condicional cu tempo di prueba di 2 aña
y tambe e lo bay bou guia di Reclassering.
Fiscal a pidi un castigo mucho mas pisa p’e hoben
aki, cu ta di 12 aña, pero Corte a dicidi a base di e
raport di Reclassering cu esaki ta mucho halto y
cu Ministerio Publico no a tuma na consideracion e
raport di Reclassering.
E otro hoben di 18 aña di inicial F.T. Corte a haya
e hoben aki culpabel di a participa den tres caso di
asalto cu arma di candela y den un caso e tabata
un complice y el a worden sentencia na un casito
di tres aña y seis luna di prison di cual seis luna ta
condicional cu tempo di prueba di dos aña y e hoben
aki tambe despues lo pasa bou guia di Reclassering.
Inicialmente Fiscal a exigi p’e hoben aki 9 aña di
prison y sin duda el a sali di bon cu e decision di Corte.
Den e caso di e hoben R.M. di 19 aña, Hues a haya e
hoben aki culpabel na participacion na dos biaha di
ta complice di asalto arma y a condena e hoben na
dos aña di prison di cual seis luna ta condicional cu
tempo di prueba di dos aña y e tempo lo tin cu keda
despues bou guia di Reclassering.
Pa loke t’e acusado mas bieu den e caso aki, esta J.R.
di 25 aña, Hues a haya su persona culpabel di e
acusacionnan contra su persona y a pone enfasis cu e
homber aki no a mustra ningun tipo di arepentimento
di loke el a haci y a bay over na impone e castigo mas
pisa di 6 aña di prison.
Ministerio Publico inicialmente a pidi un castigo di
11 aña di prison p’e homber aki, pero Corte a den
su decision a tuma na consideracion e forma con a
dicta sentencia contra di e otronan loke a bin scapa e
homber aki di cinco aña di prison.