Page 29 - MIN.TTC JUNE 12

Minister Otmar Oduber: Mi colega de Meza a haya
rason!

Friday, 12 June 2015 08:39

Comparti

Diahuebs atardi Ministerio Publico a informa di nan decision di no start cu ningun investigacion rond di e
keho entrega dor di Jan de Ruijter contra varios mandatario, entre otro Minister Otmar Oduber, relaciona
cu e proyecto di Hard Rock Hotel. “Mi colega Mike de Meza a haya rason.

E hendenan aki ta set di porco sushi cu ta busca muraya limpi pa frega nan lomba na dje”, asina Minister
Otmar Oduber a reacciona for di Cuba.
E mandatario a bisa di ta lamenta cu e mesun grupo aki, cu ta partner di partido MEP, ta purba atacha
nomber di hende dor di constantemente keha tur hende na husticia. Dor di haci esey nan ta purba a crea
un percepcion cu e personanan envolvi mester tin cualkier sorto di envolvimento den cualkier tipo di
iregularidad. Tur esaki siendo cu nan ta bon na altura cu nan ta haciendo keho falso pasobra tur locual
nan ta purba crea no ta existi y sigur no den e orden cu nan ta purba hinca e hechonan. “Mi tambe a
entrega un keho penal contra Jan de Ruijter na husticia, pa difamacion, pasobra mi lo no keda man crusa
y permiti pa diariamente e ataca mi den media y purba keha mi dor di entrega kehonan falso na husticia”,
asina e mandatario a sigura via telefon. E ta consciente, y el a biba esaki pa hopi aña, cu como politico
mester tin un cuero basta diki pa wanta critica. “Pero esey no kiermen si cu mi tin cu wanta acusacionnan
falso y di hendenan cu ta purba atacha mi bon nomber”.

Ministerio Publico a recientemente yega un decision final tocante e denuncia di señor Jan de Ruijter na
december 2014 cerca Fiscal Mayor, relaciona cu supuesto iregularidad den e proyecto di construccion di
Hard Rock Hotel. Ministerio Publico a laga sa den un comunicado di prensa cu nan a basa nan decision
riba e conclusion cu no tin un sospecho rasonabel di culpabilidad cu e personanan contra kendenan Jan
de Ruijter a haci denuncia, cu nan lo a haci nan mes culpabel di algun hecho castigabel. For di e
documentonan cu Jan De Ruijter a entrega na Ministerio Publico y otro documentonan riba cual
Ministerio Publico ta dispone mientrastanto, no por conclui cu tabatin regalonan, promesanan o
servicionan na Minister di Turismo of cualkier otro ambtenaar. No a haya den e documentonan ningun
iregularidad den e seleccion di e partinan cu a participa na e destaho of e proposicionnan pa e proyecto, ni
den e concesion di e proyecto di construccion na Soutwest. E seleccion tabata habri y transparente y a
tuma luga dor di un comision di evaluacion independiente. Di nada ta sali cu tabatin trato preferencial pa
Southwest. No tin ningun indicacion tampoco di iregularidad di banda di Southwest despues di e gunning
di e proyecto. For di e documentonan no ta sali cu tabatin falsificacion di documentonan relaciona cu e
garantianan di banco di Southwest.

“Mi ta spera cu e wega aki caba tambe, tanto di parti di Jan de Ruijter como tambe di su aliadonan di
MEP, pasobra como mandatario ta trahando duro, logrando cifranan historico den turismo, pa hendenan
asina a base regular ta purba na kibra bo y daña bo bon nomber”, asina e mandatario a termina bisando
den un bos serio.

http://www.24ora.com/politica-mainmenu-18/96227-minister-otmar-oduber-mi-colega-de-meza-a-
haya-rason