Page 18 - Awemainta

18 AWEMainta Diahuebs, 24 Maart 2016

Percura pa tin vaarbewijs y keuringskaart abordo

Kustwacht ta bon
prepara pa Semana
Santa

Ta adverti botonan pa keda for di area destina pa
landadonan

“NOS tin henter un plan prepara pa atende cu tur e actividadnan cu lo tin riba lama

e weekend aki, debi na Semana Santa”, asina Luis Kirindongo, Hefe di Operacion
di Kustwacht Steunpunt Aruba, a duna di conoce.
E ekipo di Kustwacht ta den deliberacion estrecho cu Polisnan Maritimo pa e area
pabou di brug y cu Polisnan di San Nicolas pa e area pariba di brug.

E intencion ta pa durante henter dia tin patruyanan di Kustwacht patruyando na
nos beachnan pa garantisa siguridad riba lama, tanto pa esunnan den boto como
tambe pa esunnan landando.

Pa por ta riba lama, e boto mester ta registra y gekeur na Directie Scheepvaart
y esun cu ta maneha e boto mester tin un “vaarbewijs” den bo poder. Esaki ta e
dos documentonan esencial cu mester tin riba e boto na momento di control di
Kustwacht.

Den caso cu tin un incidente riba lama y specialmente si mester servicio di rescate
por yama na e number di emergencia na 913 cu ta traha 24 ora pa dia. E otro
number cu por comunica cu e central di Kustwacht ta +5999-4637700 cu lo por
drenta den contacto cu e botonan na Aruba y den
henter Caribe Hulandes.

Kustwacht ta conseha tur esunnan cu ta subi lama, no
solamente e fin di siman aki, pero tur otro dia tambe,
pa ta bon prepara cu un radio VHF abordo. Esaki pa
por yama pa pidi ayudo via canalnan 16, 11 y 68. Sin
lubida otro materialnan manera un spiel of flashlight
abordo.

Separa di esaki, percura pa e motor di e boto ta den
bon condicion. Pa tin salbabida, flaire, celular y hasta
si por considera pa tin un “satelite phone” abordo.
Tene cuenta cu e cantidad maximo di pasahero cu por
tin abordo, cu riba su mes por ta un peliger. Percura
pa tin suficiente combustibel abordo.

Specialmente e fin di siman aki cu lo ta ocupa na
beachnan, ta adverti botonan pa keda pafo di e area
destina pa landadonan. Lo controla rib’e aspecto aki
pa por garantisa siguridad pa landadonan.

Kustwacht tin diferente tarea, manera combatimento
di trafico di hende ilegal, droga, arma, mantencion di
ordo publico riba lama y tambe rescate.
Guarda Costa di Caribe Hulandes ta dispone di
avionnan, helicopter, Fregata, cutter y botonan
pa patruya, sirbi comunidad y yuda botonan den
problema riba lama.