Page 88 - MIN JUS

Ambos abogado a para riba nan punto y a busca diferente angulo legal pa purba convence

e Magistrado cu nan cliente tin rason y cu nan argumento tin base pa sea cambia e

decision of mantene e decision. Hues a scucha ambos presentacion legal cu masha

atencion y na final, a dicidi cu e no por bay di acuerdo cu e demanda di MEP pa cambia e

decision tuma.

Parce cu pa hopi aña caba ta un tradicion cu e partido na mando ta core e ultimo parada

riba diadomingo prome cu eleccion. Pero, e aña aki Cuerpo Policial Aruba, despues di a

acorda e fechanan pa tur partido caba, a purba cambia e maneho dor di sugeri pa tira “lot”

pa ken lo core e ultimo parada. Esey no a cay den bon tera cerca Gobierno y Minister

Presidente, kende alabes ta encarga cu Asuntonan General, bou unda “Orden Publico” ta

resorta, a tuma un decision cu ta mantene e maneho y ta duna AVP e ultimo parada.

Ainda despues di esey Polis a sugeri pa cambia e decision, pero Gobierno a subraya cu e

decision ta den man di Minister Presidente y ta un poder cu Altocomisario por tuma den
su nomber. Como cu den e caso aki MinPres a dicidi, ta duna Polis poco espacio pa

maniobra.

Hues a enfatisa cu ta dificil pa Corte cambia un decision di e autoridad cu tin e poder pa

haci tal. E Minister Presidente tin hopi poder den e tipo di permisonan asina y no ta duna
mucho espacio pa “toets” su decision. Cu esaki diadomingo awo AVP tin e derecho legal

pa core parada.