Page 35 - AVP

Fraccion di AVP ta sostene e idea inicial di e fondo pa proyectonan social.
Lamentablemente nos ta mirando cu tin mas y mas duda con e fondo ta wordo maneha
p’e Minister. E placa no ta yega na resolve problema real, pero tin mas y mas indicacion
cu ta uza e placa pa duna hende trabou. Riba su mes esaki no mester ta algo malo. Pero
mester duna hende profesional den nan field trabou. Hende cu tin curason pa yuda den e
area social, hende cu formacion con pa brinda yudansa y guia na esnan cu mester di
esaki.

Tur cos ta costa placa. Con bo ta pone bo prioridad ta loke ta mustra si bo lo tin exito of
no. Ideanan necesario pa combati e problema di adiccion y cual mester:

1). Investiga profundamente kico ta raiznan di e problema di adiccion pa stipula bo plan
di maneho; 2). E importacion di droga; 3). Combati e produccion di droga aki na Aruba
den tur forma; 4). Bin cu programanan di conscientisacion y prevencion; 5). Yuda cu
programanan di rehabilitacion; 6). Crea infrastructura di centronan pa brinda yudansa na
adictonan; 7). Brinda trabou na hende cu curason y formacion pa yuda den field; 8). Bin
cu centro pa yuda hobennan den adiccion; 9). Bin cu centro pa hende muher; 10). Bin cu
centro pa double trouble, esta hende cu mester di ayudo y guia pa nan adiccion y
condicion mental; 11). Incentiva comercio pa tuma hende den servicio cu un pasado di
adiccion.

Si realmente Gobierno kier yuda combati droga y si realmente Gobierno kier un Aruba
liber di droga, Gobierno mester cuminsa papia menos y haci mas. Gobierno mester
demostra e deseo aki den su accion.

No papia di legalisa, pero papia di prevencion. No pone placa den conferencia di droga,
pero pone placa den prevencion di adiccion. No laga palabra bunita ta bo legacy. Laga bo
hechonan concreto pa un Aruba liber di droga ta bo Legacy real, Robert Candelaria a
finalisa su comentario.