Page 27 - AWEM 16.01.15

26 AWEMainta Diabierna, 16 Januari 2015

Prome Minister a cuminsa cu accion den bario di Pos Chiquito

Habitantenan orguyoso di maneho
cu lo beneficia futuro di Aruba

PROME Minister Mike Eman a cuminsa cu su prome

accion di bario na Pos Chiquito diahuebs mainta, compaña
pa miembronan di Servicio pa Comunidad y Bario (conoci
como BoBario), funcionarionan di SERLIMAR y tambe cu
presencia di Bus di Salud.
E tabata un bishita di mas o menos dos ora unda cu mayoria
di e casnan bishita tabata di hendenan grandi cu a biba casi
henter nan bida den e bario.
Prome Minister Eman a cuminsa cu na cas di famia Winterdal,
splicando e famia di e plannan cu tin pa Green Corridor den
cual ta inclui embeyecemento di e caminda completo di Pos
Chiquito y unda e camindanan na banda despues di Pos
Chiquito ta wordo renoba pa sirbi e fluho grandi di trafico
cu tin entre e parti pariba y pabou. “Esaki ta un plan grandi
di Gabinete Mike Eman II, cu nos ta spera cu su ehecucion lo
cuminsa pronto,” e mandatario a bisa famia Winterdal.
Varios miembro di e famia a compaña e mandatario den
su caminata den e bario unda cu a splica cu e meta no ta
uno politico pero pa scucha cual ta deseonan di e bario y
cu SERLIMAR su funcionarionan tey pa yuda den limpiesa,
principalmente unda cu tin hopi sushi acumula.
Mayoria di e habitantenan ta papia di camindanan asfalta y
mas iluminacion den e areanan cu no a bini na remarca pa
luz aña pasa.
Tur habitante bishita tabatin comentario positivo pa e
trabou cu Prome Minister Mike Eman y su Gabinete a bin
ta haciendo desde 2009. “Kisas nos mes lo no mira of sinti
tur e resultadonan, pero nos yiunan y nietonan si,” tabata e
comentario di Dionisio Maria, kende a para na cura di cas pa
warda riba e mandatario.
Tur peticion haci di e ciudadanonan tabata pa mira con por
yuda recoge sushi acumula cu nan mes no tin e vehiculo
adecua pa deshaci di nan, of matanan grandi cu ta forma un
problema pa cas.
Bus di Salud tambe tabata un exito, ya cu for di momento cu
el a staciona mainta tempran, e pashentnan a cuminsa yega
te den oranan di merdia.