Page 12 - AM210417
P. 12
12 AWEMainta Diasabra, 17 April 2021
Projecto “opknapbeurt scholenproject – haci bo scol bunita” den su fase final
NA februari ultimo, AFAS Foundation representa pa sr.
Rothmar Coenraad, Manager di AFAS Software aki na
Aruba, a otorga diesseis (16) scol un presupuesto pa ehe-
cuta un proyecto cu ta na beneficio di e scol.
E bunita proyecto aki ta un iniciativa di AFAS Founda-
tion cu a y ta wordo carga pa un grupo di Project-Leiders
di AFAS di Hulanda, Corsou y Aruba. Tur scol na Aruba
a haña un invitacion por escrito pa presenta un proyecto
cu su respectivo plan y presupuesto. E invitacion obvia-
mente a inclui e criterio a base di cual AFAS Foundation
lo aproba un proyecto, y alabez indicando cu e proyecto lo
mester wordo ehecuta cu ayudo di boluntarionan.
Durante e proceso, y recientemente, varios scol a comparti
e progreso di nan proyecto riba nan respectivo pagina di
medionan social, como tambe a comparti e progreso di nan
respectivo proyecto cu gerencia di AFAS Software Aruba
pa medio di potretnan tuma durante cu e trabaonan ta
wordo ehecuta. Pues mayoria di e diesseis scolnan sea a
conclui nan proyecto caba of ta haciendo e tokenan final
na nan proyecto. Adhunto un reportahe grafico di algun di
e proyectonan.
Finalmente, AFAS Foundation kier recorda e demas scol-
nan cu falta apenas dos siman pa clausura e proyecto. Ala-
vez ta encurasha nan pa comparti nan proyecto pa medio
di nan pagina di medionan social, sin lubida di “tag” e pag-
inanan di AFAS Caribbean y AFAS Foundation.
Den e proceso scolnan lo haña bishita di representantenan
di AFAS Foundation pa huzga e trabaonan a base di e
criterio ya estableci y na comienzo di e luna di mei e ga-
nador absoluto lo wordo anuncia. Tocante AFAS Founda-
tion: AFAS Foundation t’e expresion mas puro y bunita di
e compania AFAS Software. E ta refleha unda e curason
di e empresa ta. E fundacion ta pa tur hende, sin importa
di cua parti di mundo e peticion pa ayudo ta bini, y ta in-
dependiente di creencia, orientacion, genero of e color di e
persona.
AFAS Foundation ta pone placa disponibel pa proyec-
tonan rond di mundo y ta apoya proyectonan den e arean-
an di salud, educacion y sociedad. Manera ta custumber
di AFAS, tur loke ta wordo haci ta basa ariba inovacion
y transparencia. AFAS Foundation kier logra un impacto
substancial tanto local como na nivel internacional.
