Page 5 - CMB

Kiwanis Cu Exitoso Prome Atardi Di Storia Di ‘Axel Y

Su Pork’i Spaar’

 Local
- 26/07/2018

Manera a wordo anuncia na comienso di juli 2018, Kiwanis Club of Young Professionals
Aruba (KYPA) durante e temporada di vakantie a lansa oficialmente su buki ‘Axel y su
Pork’i Spaar’ en conexion cu e proyecto ‘Placa Chikito’.
E proyecto ‘Placa Chikito’ a cuminsa na aña 2012 caminda cu a identifica cu e topico di
finansa personal mester di mas atencion.
E aña aki e proyecto ta wordo presenta pa di tres biaha den un forma nobo. Pa tin un
impacto mas grandi y duradero e comision encarga cu e proyecto a dicidi pa desaroya un
buki pa den forma di un storia conscientisa y educa muchanan.

E buki ‘Axel y su Pork’i Spaar’ cu a wordo scirbi p’e mente creativo di Edselyn Figaroa
y ilustracion imaginario di Leidys Ledesma a wordo presenta n’e prome atardi di storia
diasabra ultimo na MFA Noord.
E buki a wordo presenta den un forma unico caminda cu boluntario di Fundacion Bon
Nochi Drumi Dushi; Desiree Correa a presenta un parti di e buki via poppenkast.
Sigur e muchanan a disfruta di un atardi diferente y educativo caminda e muchanan a
haya nan buki di ‘Axel y su Pork’i Spaar’ y tambe un spaarpot regalo.

E Atardi di Storia ta danki na diferente partners cu ta kere den un proyecto asin’aki.
Fundacion Bon Nochi Drumi Dushi cu nan manera unico pa presenta e buki, Elite
Productions cu nan asistencia audio visual y por ultimo e aporte di Aruba Bank y
Caribbean Mercantile Bank pa por haci e proyecto aki realidad un biaha mas.