Page 14 - AGF July 18 & 20 2015

Rene Kan (AGF): Nos ta orguyoso cu Aruba Caribbean Hotel ta bek den man
Arubiano
Sunday, 19 July 2015 18:42

Comparti

Dia 15 di juli 2015 tabata “un dia increibel”, “un cuminsamento bunita”, asina Rene Kan di Aruba
Growth Fund a expresa despues di e anuncio oficial y di prome encuentro general di e gerencia y
empleadonan cu representantenan di Aruba Growth Fund y Hilton den e ballroom di e hotel.

A baha e nomber Radisson for di e edificio y tur cos ta “on schedule” pa cuminsa e “rebranding”
completo di e hotel pa bira Hilton Aruba Caribbean Resort & Casino.

Rene Kan ta e partner di Aruba Growth Fund cu tabata encarga cu e negociacion y compra di "La
Grande Dame" pa comberti’e den un Hilton. El a expresa cu ta kisas un coincidencia, pero sigur uno
hopi remarcabel y bunita cu hustamente e hotel ta pasa bek den mannan di un fondo netamente
Arubiano den e luna di juli, como cu tabata dia 18 di juli 1959, esta 56 aña pasa, cu e hotel aki a habri
su portanan pa su prome huespednan.

Pa Aruba completo e ta un dia bunita, “mi ta kere cu nos mester ta orguyoso,” el a bisa, subrayando cu
Aruba Caribbean Hotel ta pertenece bek na e pueblo di Aruba, cu inversion for di e fondonan di
pensioen mas grandi di Aruba. Esaki ta nifica cu tur contribuyente na e fondonan di pensioen di
APFA, Pension Fund Tourism Sector Aruba, di e fondonan di pensioen di empleadonan di NV Elmar,
WEB Aruba N.V., Aruba Ports Authority N.V. y Caribbean Mercantile Bank N.V. ta un doño chikito di
Aruba Caribbean, asina. Rene Kan a remarca. Na tur nan ta alcansa mas di 10 mil contribuyente, cu
mensualmente ta spaar pa nan pensioen, di cual e fondonan di pensioen ta inverti pa rende nan cen
mas cu por.

El a agrega cu e ta spera cu ora tur esunnan cu ta participa na e fondonan di pensioen aki ta prepara
pa celebra ocasionnan importante y dianan special manera un aniversario, Dia di Mama, Dia di Tata,
etc. cu “boso lo celebra esaki den boso hotel”.

Rene Kan a splica cu mescos cu e tin recuerdonan bon di e hotel cu el a cuminsa bishita 50 aña pasa cu
su wela, mas hende local, trahadonan, pioneronan den turismo y sigur un cantidad grandi di
bishitante fiel pa dos y hasta tres of cuater generacion tin bunita recuerdo di e hotel aki y nan curason
ta cu Aruba Caribbean.

E hotel ta construi desde aña 1959 y tabata e prome hotel “Full Service Luxury Resort” situa riba Palm,
Beach cu 355 camber parti den tres edificio. E servicionan di e hotel ta varia di un SPA, Fitness Center,
ballroom espacioso, casino, 5 restaurant y bar, dos swimming pool, Business Center y un beach masha
grandi su dilanti. Nan tin mas o menos 450 empleado den servicio directo mas 75 empleado trahando
eyden via otro companianan.

Lo tin cambionan grandi den e “rebranding” di e hotel den su transicion di un Radisson pa un Hilton.
Lo tin renobacion di e cambernan, e lobby y e restaurantnan y mayoria di e trabao aki lo tuma luga na
aña 2016. Den algun tempo tambe lo cuminsa cu expansion di e hotel pa asina hisa e rendimento pa e
casino, e restaurantnan y e tiendanan.