Page 22 - MIN VOS

Competencia di CARIFTA 2016 den e deporte di atletismo lo ta na
Grenada
Wednesday, 16 March 2016 15:35

Comparti

E anja aki e CARIFTA Games den e deporte di atletismo lo celebra e hecho cu nan lo tene e di 45 edicion
di e weganan regional aki.

Mas cu 500 atleta den henter e region di Caribe lo ta presente e dianan 24 pa 29 di maart proximo den un
stadion completamente nobo cu porcierto lo wordo inaugural specialmente durante di e weganan di
Carifta. Mas cu claro Aruba tambe lo tin un delegacion bon representa na Grenada. Un total di 6 atleta lo
compete den e campeonato di Carifta, esakinan lo ta Lixandra Geerman di Ytrack den Heptatlon cu un
record di 3980 punto, e lo compete den e categoria di U20. Tambe nos ta haya Julianne Dorothal di N&21
den e disciplina di Heptatlon cu un record di 4180 punto, e lo compete den e categoria di U20. E hoben
sprinter Reginald Koc di Y-Track lo competi den e 100m y 200m sprint y den e categoria di U20, mientras
Justice Dreischor di AAC lo competi den e 800m. Ta bon pa bisa aserca cu e hoben Dreischor a clasifica
den e 800m kibrando e record den Junior cu tabata riba nomber di e legendario coreor riba distancia
largo Richard Rodriquez, e tempo marca tabata 1 minut y 58 seconde. Por ultimo nos tin Toni Lisa Brown
di Ytrack cu lo competi den e 100m y 200m sprint como tambe bula lew esaki den e categoria di U18 y
Wuill Vrolijk di N&21, e lo competi den e categoria di U18. Como oficial lo biaha Ericko Pieternella,
Virginia Dirksz y Kenneth Lucas. Pa varios aña e delegacion di atletismo ta competi den e campeonato di
CARIFTA cual ta esun mas grandi den henter Caribe.

E mihonan atletanan di Caribe pa loke ta e categoria hubenil lo ta presente den e campeonato aki, e
mayoria despues ta bira atletanan renombra cu a lo largo lo representa nan pais den e Weganan Olimpico.
E resultadonan obteni pa e mayoria islanan di Caribe den entre otro Weganan Panamericano y Weganan
Olimpico ta papia pa nan mes, sigur paisnan manera Jamaica, Grenada, Barbados, Trinidad & Tobago y
Barbados. Un danki sigur na Lotto, e Loteria di Aruba pa medio di Comision di Subsidio cu a subsidia e
delegacion di atletismo cu lo competi den e 45 edicion di e campeonato di Carifta. Cumprando weganan di
Lotto, e Loteria di Aruba manera Catochi, Big 4, Zodiac, Wega di Number Korsou, Lotto di Dia, Lotto 5,
Mini Mega, Mega Plus y weganan di Raspa bo ta contribui na deporte riba nos isla. Meta di e fundacion ta
pa organisa loteria, cambia bida di su hungadonan y na mes momento inverti den deporte local pa medio
di donacionnan na e Comision di Subsidio.