Page 11 - UTILITIES

David Britten: Diaranson awo lo bay cuminsa pone e prome
capa di asfalt riba e caminda di Sabana Basora

Monday, 12 June 2017 20:00
Comparti

E proceso di construccion di e caminda di Sabana Basora ta andando. Segun David Britten di BIC, kende
ta encarga cu e proyecto aki, ta un proyecto di 2.5 kilometer di caminda.

E ta un proyecto cu a cuminsa basta dia pasa. Si e ta un proyecto cu tin cu bisa cu e stof cu a ocasiona
tabata masha hopi mes pa hopi di e casnan. Ta un caminda cu autonan ta pasa hopi duro riba dje. Asina
mes cu no tin asfalt mes ainda. E ta asina leu cu ta poniendo e ultimo capa di basecourse, cu ta bin riba e
caminda pa preparacion pa pone asfalt. Den fin di siman a traha riba dje y ta kedando cla cun’e. Ta
premira cu pa diaranson ta cuminsa pone e onderlag, esta e prome capa di asfalt. Lo bay cuminsa pone
pa por tap’e pa caba pa asina purba di alivia e situacion tambe. Tambe e tabata un proyecto cu tabata tin
su reto, mirando e trabaonan cu tin ta andando riba Green Corridor, cu hopi desviacion ta pasa y esaki ta
un caminda alternativo. E ta un ader hopi principal pa e usuarionan, vooral esnan cu ta bay pa Santa
Cruz. El a crea su dolornan di cabes. Pero ta contento den e sentido cu por fin awor aki tin na horizonte
cu ta kedando cla cu e parti di asfalt, pa asina ey e por keda cla na tempo.
Trabaonan pisa

Esaki tabata un reconstruccion total di e caminda. A ranca full e caminda pasobra den estudio cu tur
hende a haci, no tabata tin fundeshi mas cu por a wanta e asfalt. E tabata asina hopi kibra cu ta henter e
caminda, plus e fundeshi mester a ranca y tur cos mester a bin di nobo. Na e manera cu a trah’e, cada
banda di caminda a bin su banchinan di beton pa proteha e asfalt, cu e ta kedando asina leu di keda cla.

Ki dia e ta habri
Una bes cu e contratista pone e asfalt cu ta bay dura algun dia, manera cu e asfalt cla, lo habri e caminda.
Unico trabao cu ainda ta keda pa e compania, ta e bernnan cu tin cu traha den e asfalt. Pero esey lo bay
wordo trata pafo di caminda, pues e no lo ta un estorbo ni pa e habitantenan, ni pa e usuarionan di e
caminda. Pesey a scoge e metodo aki tambe, pa busca un manera pa keda cla cu e caminda mas pronto
posibel. Una bes cu keda cla cun’e, lo traha na banda di e caminda, pa facilita e uzo di e caminda tambe.