Page 113 - KPA_Neat

Mas di 100 Polis NO ta sostene declaracion di sindicato SPA

Thursday, 13 July 2017 20:27
1

Comparti

En conexion cu e ultimo declaracionnan haci publicamente dia 7 di juli ultimo dor di Presidente y Vice
Presidente di Sindicato di Polis (SPA) cu nan miembronan y no miembronan di Cuerpo Policial Aruba
no tin confiansa mas den Mando Policial, specificamente den Alto Comisario di Polis, mr. Adolfo “Dolfi”
Richardson, un grupo preocupa a saca mesora un circulario y mande pa tur Polis. Contenido di e memo
aki ta encera cu miembronan preocupa semper ta sostene sindicato pero den e caso aki NO ta sostene e
declaracionnan ariba menciona, haci dor di tanto e Presidente como e Vice Presidente di SPA, anto sin
aprobacion di nan miembronan.
E circulario aki, di acuerdo cu e 6 Polisnan firmante, ta conta cu sosten te cu awor di mas cu 100 persona
trahando den Cuerpo Policial Aruba. Miembronan preocupa di Cuerpo Policial Aruba lo manda directiva
di sindicato SPA un carta exigiendo un reunion cu punto di agenda, aclaracion riba nan declaracion haci
dia 7 di juli 2017 dilanti Bestuurskantoor y den medionan social.
E situacion aki ta haci cu e directiva, cu apenas a cuminsa encabesa e sindicato, ta haya nan cu nan
prome reto cu nan miembronan. Specialmente faltando 2 luna mas pa eleccion, ta bisto cu tin un
polarisacion enorme den Polis y cu e Cuerpo ta dividi den e dos partidonan mas grandi. Aunke cu SPA a
bisa enfaticamente dilanti Bestuurskantoor cu nan no tin problema cu Minister Dowers pero mas bien cu
e maneho di KPA, toch e Polisnan ta sinti cu no por laga nan Alto Comisario cay y cu nan ningun
momento a duna e directiva e mandato pa bisa algo semehante. Un grupo awor ta exigiendo eleccion
nobo pa cambio di e directiva di SPA, pa mustra nan cu no ta e Alto Comisario ta e problema sino cu SPA
mes ta parti di henter e problema actual.