Page 15 - AM221206
P. 15
Diamars, 6 December 2022 AWEMainta Deporte
Team Tsunami a
caba cu tur leyenda
den domino!
ntes bo tabata haya Ghostbusters, despues a bini Myth-
A busters, y desde diasabra ultimo 3 di december, awo tin
“Legendbusters” tambe! Aki tin un team di domino cu ta cla
pa caba cu tur legendario y nan leyenda den domino aki na
Aruba. Den un tremendo bataya diasabra ultimo, Team Sams
Tsunami a demostra cu nan t’e sheriff nobo in town ora nan
a enfrenta e conocedo ekipo Pariba Legends di pariba di
brug. Wel, shonnan, desde awo en adelante nan por cambia
e nomber dje team pa “Pariba Sprookjes”. Golpi duro a cay
diasabra n’e palacio di domino net n’e grens entre Calabas
y Kudawecha, net paseit dje palo di mal ehempel caminda e
perdedonan ta bay pasa nan wayaba.
Despues di un tremendo “peptalk” di capitan di Team
Tsunami, nada menos cu e conocedo “zware jongen” den
domino, Yoyo, a splica intensamente over dje palabra
“Tsjalynch”, e ekipo bou patronisahe di Sunny a sali ta haya
un sapato blanco! Clean board a cay pa Yoyo y Sunny! Pero,
e dos lider veterano aki a dicidi cu nan ta esunnan cu lo
wanta un p’e team, pa despues e ekipo por sigui suta na un
manera sin pordon! Pa ora halftime a bati, Team Tsunami ta
ganando cu score fenomenal di 11 - 4! Mientras un y tur ta
disfruta dje pasapalonan gratis di chef Han, e integrantenan
di Pariba Legends a haya nan ta grawata cabes (y snor) con
pa bay drecha e situacion aki! Den di dos buelta nan a ripara
cu ta mescos ta awa nan ta hiba lama.
Team Tsunami a sigui bati piedra na ordo y cu score convi-
cente di 21 - 13 nan ta caba cu cualkier idea di legendario
cu Pariba Legends por a keda cu ne. Tremendo anochi aya
n’e legendario y unico Domino Square Garden na mundo,
y shonnan, keda pendiente, pasobra t’awo cos ta cuminsa
bira hot p’e temporada di fin di aña!
15
