Page 6 - WEB

ORANJESTAD (AAN) – Cobranzanan di coriente pa di luna pasa cu mester paga na Mei
proximo, ta yegando na mail-box di e consumidornan y esakinan a mira cu asombro cu
compara cu loke nan a paga e luna aki, e diferencia den e suma grandi.

Matutino DIARIO a ricibi varios yamada di consumidornan cu ta bisa nos cu nan no sa
mas con pa maneha e uso di coriente. Nada a aumenta den nan cas: mesun airco,
mesun frishider, mesun TV, mesun ora di sali y yega cas unda frishider so ta keda
traha, y ora nan yega cas atardi laat ta e luznan necesario nan ta cende prome cu bay

drumi y despues nan ta apaga nan, y ta airco so ta traha.

Sinembargo, e cobranza a bin pa entre 80 pa 150 florin mas halto cu e suma cu nan a
caba di paga di e consumo anterior.

Ta parce comosifuera cu e 2.5% mas a cuminza conta caba pa WEB-ELMAR, pasobra ki
hustificacion por tin? Ta conoci cu entre Juni y October semper e costo di coriente ta bin
mas halto debi na e filosofia sabi di Elmar cu e consumidor ta uza mas aire debi na e

calor (independiente si den e cas tin airco of no), pero apenas nos ta na April. Di con e
aumento di prijs di coriente aki?

Pa colmo no tin caminda pa bay reclama. ELMAR semper sa con pa hustifica su mes.

Consumidornan no ta kere cu e compania aki ta bay honra e deseo di Gobierno di baha
prijs di awa y coriente ora cu, oficialmente, e 2.5% drenta na vigor, pasobra ta muestra
cu cerca e compania di utilidad aki el a drenta na vigor inoficialmente caba!

No tin duda cu pueblo tin cu cuminza mara faha mas duro ainda for di awor caba, no
warda ora e aumento di impuesto yega, cu tampoco ta sigur cu e lo ta temporal
pasobra e ta depende di un reforma fiscal cu ainda no ta presenta y menos, aproba!