Page 49 - AVP

Parlamentario Arthur Dowers

ORANJESTAD (AAN): E momento a yega pa Minister di Husticia Andin, acepta y ehecuta
e bon conseho cu tres aña atras Parlamentario Bikker a sugeri na Minister Dowers, pa e

tuma su retiro mirando cu e ta cumpliendo cu net nada di su promesa haci na pueblo.

Parlamentario Arthur Dowers a mustra cu comunidad completo ta pasando den
momentonan dificil, no solamente pa e presion financiero cu gabinete Wever Croes a

implementa riba pueblo, pero pa un inseguridad total rond di e isla cu tantisimo caso di
atraco y ladronicia.

“Ya mi a yega di bisa esaki caba, Aruba no tin un Minister di Husticia pero un Minister di

Inhusticia caminda Andin Bikker solamente a logra di cumpli cu su soño di un dia bira
Minister di Husticia pero en realidad mirando loke ta tumando luga rond di nos isla,
simplemente e no ta cumpliendo cu su obligacionnan.

Den pasado na tur momento c’un atraco sosode, el a bay prensa y hasta den
Parlamento pidi mi persona pa entrega mi retiro pero ta expresionnan cu el a lubida cu
el a haci ya cu loke ta pasando na e momentonan aki, ta simplemente tristo.

Ciudadanonan cu practicamente no por sali un rato di nan cas, ya cu nan por wordo
atraca riba caminda publico of ora cu nan yega nan cas, nan ta ripara cu ladronnan a
drenta den nan cas y bay cu cosnan valioso.

Loke ta mas remarcabel ta e hecho cu di repiente Minister Bikker ta bin dilanti y bisa cu
seguridad di nos pueblo mester ta un responsabilidad comparti, caminda no solamente
comercio pero pueblo den su totalidad mester tin participacion den e proceso pa
mantene ordo y seguridad riba nos isla.

E mesun Minister Bikker aki cu den pasado continuamente tabata grita pa retiro di mi
persona como Minister di Husticia, asina c’un caso di atraco wordo registra, awor ta
pretende cu maneho di husticia riba nos isla, no ta su responsabilidad pero di tur

hende.