Page 30 - AM250117
P. 30
30 COMUNIDAD AWEMainta Diabierna, 17 Januari 2025
Un charla exitoso di Ombudsmannen
di Reino na Universidad di Aruba
DIAMARS anochi 14 di Januari, un audiencia grandi a atende e charla ‘De
rol en betekenis van de Ombudsman’. Durante e charla, e Ombudsmannen
di Reino cu ta presente n’e encuentro anual na Aruba, a splica publico kico
e trabou di Ombudsman ta encera.
E ombudsmannen presente p’e encuentro anual na Aruba ta sr. Reinier
van Zutphen, Ombudsman Nacional, sr. Keursly Concincion, Ombudsman
di Curaçao y sra. Gwendolien Mossel, Ombudsman di Sint Maarten. Sra.
Jurima Bryson, e prome Ombudsman di Aruba, ta anfitrion e aña aki di e
encuentro anual di Ombudsmannen di Reino cu pa prome biaha ta tuma
luga na Aruba.
Den un sala completamente yen, publico presente tambe a haya un opor-
tunidad pa haci pregunta n’e Ombudsmannen y n’e manera aki informa
nan mes con e Instituto di Ombudsman ta funciona y kico nan por spera di
e Ombudsman, e Defensor di Pueblo.
Ombudsman di Aruba ta gradici tur hende cu tabata presente n’e charla
di ayera nochi y kier sigura pueblo cu lo sigui suministra informacion via
diferente canalnan di comunicacion.
Ademas, sra. Jurima Bryson ta sumamente gradici cu e presencia di su
colega Ombudsmannan n’e charla unda nan tambe por a comparti nan
conocemento y experiencia cu publico.
Oficina di Ombudsman Aruba kier informa cu nan lo mantene pueblo na
altura di e ultimo desaroyonan y encuanto e apertura oficial di oficina.
Pa por keda na altura di e ultimo desaroyonan, por bishita tambe e pagina di
Facebook ‘Ombudsman Aruba’, Instagram ‘ombudsmanaruba’ y LinkedIn
‘Ombudsman Aruba’.
