Page 29 - LOTTO

Vandalismo keto bay ta azota Compleho Deportivo Jose
Wever na Yara

Tuesday, 02 May 2017 20:12
Comparti

Desde comienso di e luna di januari, St. Fundacion Facilidadnan Deportivo (St. FFD) ta trahando duro
na e mantencion y renobacion di e diferente facilidad nan deportivo cu ta cay bou di nan maneho
conforme e maneho di nos Ministro di Deporte, Dr. Alex Schwengle.

Un di e facililidad nan aki ta e compleho deportivo di futbol na Yara, conoci tambe como e veld di futbol
infantil Jose “Buchi Panama” Wever. Esaki ta un projecto combina hunto cu e socionan di Lotto, esta e
federacion mundial di futbol FIFA y federacion di futbol Arubano, AVB. Recientemente a cuminsa na
termina e trabounan haci riba e compleho deportivo aki y hacie mas pronto cu ta posibel operacional den
e forma manera e mester ta. A traha un muraya di beton rond di e compleho mientras a pone un tribuna
pa e publico por mira e weganan di futbol. Algun dia pasa a duna e lugar un facelift completo door di verf
esaki y pinta e logo di Lotto paden y pafor di e facilidad. Lamentablemente mester constata cu un biaha
mas vandalismo a haci su entrada pa di tantismo bes na e facilidadnan cu grafitti pinta riba e murayanan
y rastro di piedra marca riba e murayanan di e compleho. Por mira cu hasta outo ta subi riba e tereno
mirando cu a haya zeta riba e veld. Den su calidad como tesorero di St. Fundacion Facilidadnan
Deportivo (St. FFD), Sr. Di-Stefano Wernet RA a conta cu Lotto ta inverti hopi placa den tur e facilidad
deportivo aki pa asina esaki por funciona den e miho forma posibel pa tur cu ta haci uso.

Pero nan ta disapunta pa mira con hopi danjo ta wordo haci un bes mas na un hoya di facilidad manera
esun di Buchi Panama. Manera su persona mes a bisa cu deporte ta pa nos tur sin distincion den rasa,
religion, sexo & politica, awendia tin necesidad pa motiva tur ciudadano pa aporta na deporte, e ta algo
sano pa nos salud, nos educacion y nos formacion como un persona ehemplar. Den nomber di Lotto su
persona kier haci un suplica grandi na mayornan pa educa nan yuinan, cu vandalismo nos no ta gana
nada. Tambe un suplica pa hende nan di bario pa ta alerta. Haci deporte ta patria. Mester bisa cu na final
Sr. Wernet a bisa cu Lotto lo bay tuma cierto medidanan preventivo pa evita cu vandalismo lo sigui
destrui e bunita facilidad aki.

http://www.24ora.com/index.php?option=com_content&view=article&id=121386:vandalismo-keto-
bay-ta-azota-compleho-deportivo-jose-wever-na-yara&catid=1:local&Itemid=5