Page 39 - HOH
P. 39
Lider di Fraccion di POR den Parlamento, Dellanire Maduro a indica cu mirando e
situacion alarmante na nivel mundial pa loke ta trata e Coronavirus, ta spera cu Minister
di Salud por acudi na Parlamento mas pronto posibel pa e vragenuur cu a wordo pidi dia
31 di januari pasa riba e topico y con Aruba ta atende cune.
Dialuna 24 di februari 2020, Director General di Organisacion Mundial di Salud Dr.
Tedros Ahanonm Ghebreyesus a informa cu Coronavirus tin potencial di bira un
pandemia, pero ainda no ta e caso.
Dellanire Maduro atraves di Presidente di Parlamento a entrega un lista di mas di 24
pregunta na e mandatario di Salud Publico pa contesta esakinan durante un vragenuur.
Intencion di e preguntanan ta pa comunidad por ta na altura di cual ta e pasonan y
medidanan cu a wordo tuma pa evita y den su defecto minimalisa e efectonan di e virus
aki na nos isla, pero tambe pa sa con Aruba ta prepara pa atende posibel casonan of
casonan di Coronavirus.
Por mira riba diferente medionan con e virus aki ta afectando diferente pais y kico e
paisnan ta haciendo pa contene e virus, cual danki Dios no tin un mortalidad halto manera
otro virus. Pero di otro banda, por wak e impacto grandi cu e tin riba economia no
solamente di e paisnan, pero economia mundial en general door di e pasonan cu ta tuma
pa contene e Coronavirus.