Page 86 - KPA

Entrante diasabra awo, tur auto cu ta trafica riba nos
careteranan publico, lo mester tin e belasting paga

Tuesday, 27 June 2017 21:02
Comparti

Departamento di Impuesto ta mandando un mensahe pa pagamento di impuesto. Segun vocero di e
departamento, Meverly Romano, dia 30 di Juni, nos ta yega e fecha final pa loke ta pagamento di number
di auto.
Esaki ta e fecha final pa e di dos mita pa 2017. Esey ta nifica cu pa dia 30 di Juni, tur automobilista lo
mester tin full e belasting di full aña 2017 paga. Manera cu sa, e belasting semper mester wordo paga
prome cu e periodo cuminsa. E periodo nobo di e di dos mita di aña ta cuminsa dia 1 di Juli y pesey e
fecha final ta dia 30 di Juni. Esey ta un conseho cu ta manda awor aki pa tur e clientenan, pa en caso cu
nan no a haci e pago ainda di e belasting pa loke ta trata number di auto, pa haci esey ainda e siman aki,
pasobra cu entrante diasabra awo, tur auto cu ta trafica riba nos careteranan publico, lo mester tin e
belasting paga y naturalmente nan lo mester tin tambe e sticker blauw riba nan windshield.
Satisfecho
Awor aki, segun Romano, no tin un bista di e cantidad di clientenan cu a cumpli caba. Ta bezig cu e
cifranan pa e siman aki. Pero ta mira si cu e pagonan ta sosode regularmente. E ta poco remarcabel si cu
ta den e ultimo siman di Juni y awor aki ta basta keto paden. No tin mucho trafico di persona cu ta bin
haci pago, segun Romano. Esey ta basta remarcabel. Pa Departamento di Impuesto, e ta duna un
indicacion sea cu e clientenan lo tin nan belasting paga caba of cu e por ta tambe cu nan no ta worry
tampoco. Pero en todo caso e ta deber di Departamento di Impuesto pa informa su clientenan cu tin un
deadline ta yegando, cual ta dia 30 di Juni. Ta recomendabel pa esnan cu ainda cu no a cumpli cu e pago
pa nan haci’e awor aki durante e siman aki y asina evita tambe despues cu nan ta haya un cobransa
adicional of evita tambe cu nan ta haya un boet, si acaso polis para nan riba caya.