Page 19 - AWEMAINTA

AWEMainta Diabierna, 27 October 2017 19

Koffiemorgen di Angelnan di

Rosario Parokia Santa Anna

E grupo Angelnan di Rosario ta consisti di muchanan entre e edad di 8 pa 12
aña. Meta di e Angelnan di Rosario ta pa siña e muchanan reza Rosario y tambe
otro oracionnan di misa.
Dor di haci esaki e muchanan por yega mas serca Dios y asina nan por gradici
Dios y pidi su bendicion pa nan mes y nan famia.

E muchanan ta siña lesa e bijbel. Nan ta siña e ritualnan di Santo Sacrifico di
Misa. Tur den un forma interactivo. Ta usa material visual, pintamento y hand-
ernarbeid.
Pues nan ta siña kico ta hiba un bida spiritual. E muchanan ta haya cuminda
y refresco ora di bin e lesnan. Pastor Santiago t’e guia spiritual di Angelnan di
Rosario.
Materialnan manera papel, pen, potlood, copieerwerk, articulonan pa pinta pa
handenarbeid ta forma un gasto semper p’e guianan.

Pa cubri tur e gastonan di formacion di e muchanan di Angelnan di Rosario di
Parokia Santa Anna Noord ta organisa un koffiemorgen pa haya fondo p’esaki.
E koffiemorgen y un mercado di purga (vlooienmarkt) ta tuma lugar diadomingo
29 di october awor entre 8.30 di mainta te cu 12ór di media. Y lo ta den Centro
Apostolico Santa Anna. Lo bay tin pastechi, crocket, pan cu sate, Johnie Cake
cu bacalao, diferente sopi y algun otro cuminda tambe.

Bo ta cordialmente invita pa asisti n’e koffiemorgan aki. Asina bo ta yuda e trabao
di e guianan y dor di esey crea muchanan spiritual positivo pa nos comunidad.