Page 34 - MIN TTC 29 OCT 2015

Miles di turista den centro di ciudad

Publication: Thursday, 29 October 2015. Categoria: General

ORANJESTAD (AAN): Personanan cu ta transita den Playa riba Diaranzon, por a sinti un
trafico hopi congestiona riba L.G. Smith Blvd. Esaki tabata debi na e miles di turistanan cu
tabata riba pia na Playa diaranson mainta.

Tabatin tres barco crucero relativamente grandi mara den waf di Oranjestad for di ayera mainta.
Ta trata aki di Royal Princess, Carnival Breeze y Monarch of the Seas. E dos prome cruceronan
ta transporta casi mesun cantidad di pasahero, esta rond di 3600 mientras cu Monarch tin un
capacidad pa 2600 pasahero.

Por a mira tournan ta sali tras di otro mientras cu den centro di ciudad y riba e L.G. Smith Blvd
tabatin cantidad grandi di turista mobilisando, haciendo compras, disfrutando di e bista of
comiendo algo.

Cu e tres barconan aden, por bisa cu tabatin rond di 8 mil turista crucero mobilisando den centro
of rond Aruba. Pa e economia sigur e ta un boost, no solamente na loke e turistanan aki ta gasta
pero tambe e gastonan cu e crucero tin cu paga na waf di Aruba.

Den e siguiente dianan, segun por a compronde lo tin barconan crucero drentando Aruba,
mirando cu ta nan temporada esaki ta, pero no tres barco pareu. E siguiente fecha riba cual lo tin
tres barco pareu mara den waf di Oranjestad ta 26 di november.

Royal Princess a bandona Aruba rond di 5’or di atardi, Monarch 6’or di atardi y Carnival Breeze
tabata e ultimo pa bay den oranan laat di anochi. Monarch ta uzando Aruba como su homeport y
pasaheronan ta aborda e crucero aki na Aruba.

Dia 26 di november, e barconan crucero cu lo ta mara simultaneamente na Aruba ta: Carnival
Breeze; Jewel of The Seas y Serenade of The Seas. Esaki tambe lo ta rond di 8 mil turista
crucero cu lo ta bishitando Aruba na e ocasion ey, cu ta momento cu Aruba ta den pleno
temporada di fin di aña.

Pa fin di luna di october, Aruba a ricibi 22 barco crucero y ta programa cu den luna di november
35 barco crucero lo yega Aruba cu miles di bishitante cu esaki ta representa.

http://www.diario.aw/2015/10/miles-di-turista-den-centro-di-ciudad/