Page 37 - RDA

Pa añanan caba nos a consenti contrabanda di gasolin. Douane a hasta tuma un posicion

cu aki na Aruba e combustibel ta drenta legal, pues nan mester djis “paga impuesto” y ta

cla. Aunke cu tur hende sa cu ta cumpra e gasolin na Venezuela na 1 cen comosifuera ta

pa uzo local e tabata, pero ta transporte den forma iregular pa Aruba. Asina nos mes a

crea un mercado preto y di contrabanda pa competi cu e stacionnan di gasolin di Aruba,

di cual Gobierno mes ta doño di FMSA.

Asina tambe a haci cu oro, pasobra a bisa cu no sa di unda e oro ta bin pero ta djis pasa di

transito na Aruba pa sigui pa Europa. Nos nunca a para e transporte ilegal aki y cu ta

deriva di ladronicia na Venezuela.

Y por ultimo koper, cu tambe nos a cera wowo pe. Hero bieu tabata yega semanalmente

for di Venezuela riba nos waf y Douane tabata bira cara mira otro banda y bisa mesun

cos, e ta sali ilegal di Venezuela pero ta drenta legal na Aruba. Nos a aplica e mesun

pensamento di añanan 70 y 80 ora cu nos tabata sa cu e bebida, sigaria y koffie cu nos

tabata saca di Freezone di Aruba, tabata drenta Venezuela y Colombia di forma ilegal,

pero “no tabata nos asunto”.

Casi henter un refineria na Estado Falcon nan a horta y manda tur e heronan bieu y koper

pa Aruba, cu ta mande pa Europa. E hero bieu ta yega aki casi pornada pero ta bende pa

hopi placa na Europa, entre otro Hulanda.

Ta pesey, den e asunto specifico aki, Hulanda no por bisa mucho cos pasobra su mannan

ta mes of mas susha cu di nos. El a haye ta bin mesa urgente, pa cera un aliansa entre

Venezuela cu ta produci y ta for di unda productonan ta sali di forma ilegal, Aruba cu ta e

intermediario y Hulanda cu ta cumpra e productonan, pa hunto nos combati contrabanda.