Page 18 - ARUBA BANK_Neat

4 AWEMainta Diahuebs, 31 Mei 2018

Prome Minister Evelyn Wever-Croes for di Hulanda:

“Mi tarea ta pa nos yega na acuerdonan den beneficio di nos pais”

DEN e siman aki, Prome Minister Evelyn Wever-Croes ta na
Hulanda pa su prome biahe di trabou na Madre Patria. Riba
agenda Prome Minister tin reunionnan cu varios minister,
staatssecretaris y otro instancianan.

E meta principal di e bishita di nos Prome Minister na Hulanda
ta pa cuminsa reestablece e confiansa cu Hulanda mester tin
den Aruba. E confiansa aki ta kibra debi na e mal gobernacion
di Gobierno anterior. Promesanan y palabracionnan haci cu
no a wordo cumpli. E desastre financiero real cu Gabinete
Mike Eman a laga atras. Con a manipula cu Hulanda y cu
Caft. E falta di traspaso cu tabata tin tampoco a contribui.
E prome mandatario ta enfatisa cu maske nos Gobierno ta
nobo, y maske cu nos Gobierno no a haya oportunidad pa
goberna drechi ainda, toch bo ta sinti e desconfiansa.

E mandatario a sigui bisa “AVP a laga un deficit gigantesco
atras contra e ley di LAFT cu e mes a bin cun’e. Segun ley pa
2017 e deficit mester tabata 25 miyon y na final di aña AVP
a laga un deficit atras di 155 miyon, 130 miyon mas. Pa aña
2018 segun Ley mester tabata tin un surplus di 25 miyon.
Pero nan a laga compromisonan traha te na un deficit di 275
miyon, pues 300 miyon di mas.”

Awor e desafio ta pa yega na un surplus pero na un forma
structural, pa evita cu Aruba ta cay bek den e problemanan
financiero aki. Pa esaki mester di aprobacion di Hulanda.
E reunionnan na Hulanda ta trata exactamente e tema aki.
E espacio y tempo cu Aruba tin mester pa logra yega na un
surplus. Negociacionnan hopi pisa ta andando entre Aruba y
Hulanda ya pa algun siman.

“Mi tarea awor ta pa nos yega na acuerdonan den beneficio
di nos pais, pa por duna Gabinete Wever-Croes espacio
pa por goberna. E reunionnan cu Premier Rutte y cu
Staatssecretaris Knops a bay bon y constructivo. No a yega
na otro completamente ainda pasobra Hulanda kier mira
Aruba tuma pasonan pa yega na un surplus mas lihe. Pero
Aruba ta tene cuenta kico e comunidad di Aruba por carga.
Cu Fe y Positivismo nos ta sigui lucha pa yega na e miho
solucion pa nos pais”, Prome Minister Evelyn Wever-Croes
a bisa.