Page 14 - BRANDWEER - APRIL 29, 2015

Ministernan di Infrastructura y Husticia mester bisa Parlamento ki plan nan
tin

Publication: Wednesday, 29 April 2015. Categoria: Politica

Pa Caya Grandi bira accesible na Brandweer:

ORANJESTAD (AAN) – Fraccion di PDR ta hopi preocupa pasobra na momento cu a diseña
Caya Grandi, no a tene cuenta cu accesibilidad pa brandweer.

Parlamentario mr. Andin Bikker a expresa esaki den conferencia di prensa, relaciona cu e
candela den cual dos tienda a kima den Caya Grandi.

Hopi relato PDR a scucha tocante e falta di facilidad pa brandweer yega na e lugar di e siniestro,
y esaki debi cu ora nan a traha riba e diseño di renovacion di Caya, no a tene cuenta cu
brandweer, y door di esaki a tarda pa yega mientras cu por a preveni cierto aspectonan di e
candela si lo tabata tin mas facilidad pa Cuerpo di Bombero.

Parlamentario mr. Bikker a subraya cu esaki mester ta un les y wak pa futuro, y e ministernan
concerni, cu ta basicamente esnan encarga cu Infrastructura y cu Brandweer, seguramente lo bay
atende cu e asunto aki den Parlamento, pa duna un splicacion pa preveni pa algo asina ripiti.

Fraccion di PDR tin entendi cu di parti di Cuerpo di Bombero nan a premira cu algo asina por
sosode, y nan a yega di insisti caba cerca Minister di Husticia, pa nan haya un truck chikito di
brandweer, pa nan yega na e lugar na un manera mas accesible, pero esaki no ta e caso y
Minister di Husticia no a cumpli cu e peticion.

Segun Bikker kizas Minister di Husticia tin hinca den su cabes pa bin cu un tram cu pomp den
dje pa core bin ariba combati candela. El a subraya cu nos Creador a proteha pa e candela aki no
bay for di man, y mester tuma esaki como un les ya cu por scucha diferente comentario cu Caya
Grandi manera cu e ta, nan no a calcula bon con pa diseñe accesible pa brandweer, y
lamentablemente a constata cu esaki a materializa su mes den un candela basta serio. Pesey cu
bista na futuro mester preveni pa e no ripiti, Parlamentario mr. Bikker a reitera.
http://www.diario.aw/2015/04/ministernan-di-infrastructura-y-husticia-mester-bisa-parlamento-ki-
plan-nan-tin/