Page 11 - MIN ON MARCH 22,2016

AWEMainta Diamars, 22 Maart 2016 19

Minister Oduber ta gradici tur instancia pa nan dedicacion

Arubianonan tanto na Aruba
como na Hulanda a sali
celebra den grandi

ARUBA a celebra den grandi 30 aña di nos Status

Aparte y 40 aña di nos Himno y Bandera.
Un celebracion nacional cu sigur ta pasa pa historia.
Minister Otmar Oduber ta hopi satisfecho cu henter
nos comunidad a sa di demostra nan sentimentonan
patriotico, unificando bou di un Bandera y un
Himno. E respet pa nos patrimonio y pa nos prohimo
a sobresali.
Minister Otmar Oduber ta agradecido na cada un
instancia cu a contribui na nos Celebracion Nacional.

Luna a habri cu festival di un Canto na nos Himno
y Bandera infantil y hubenil, y a carga sosten masal
di un publico di mas di 3 mil persona cada anochi.
Sigui pa un anochi elegante di Poeta di Patria unda
cada Poeta a expresa nan amor pa nos isla. Un Canto
pa Aruba a supera tur expectativa unda e ganadonan
Mitch y Maya, a sa di captiva emocion di cada un cu
scucha ‘Arubiano ta esun’.
E aña aki nos a conoce un Plaza Libertador Betico
Croes completamente yen pa forma parti di e
Manifestacion Cultural y pa su siguiente mainta
tur cu tin nos pais na curason a yega dilanti oficina
di Gobierno pa celebra nos Dia Nacional den gran
forma.

Te hasta na Hulanda tur cu pa un of otro motibo ta
na nos madre patria a sa di yega hunto pa celebra
den gran forma nos 30 aña di nos Status Aparte y
40 aña di nos Himno y Bandera.
Aruba a uni den un celebracion na bienestar di nos
pais unda cu e orguyo y amor di cada ciudadano a
resalta. Hopi cas a hisa nan bandera y e cantidad di
autonan cu nan banderinnan sigur ta emociona tur
cu ta riba e pida baranca aki.
Ta netamente e orguyo aki ta locual cada un di nos
tin cu mantene pa sigui mantene e nomber di Aruba
na halto.

Minister Otmar Oduber ta finalisa dunando Aruba
pabien y danki pa a demostra e amor cu nos tin pa
nos pais.