Page 38 - MIN PAUL CROES FEB 3,2015

E aña’ki a inicia e di shete grupo di Sociale Vormingstraject (SVT), miho conoci como Formacion Social na

Papiamento. Teniente Moises Henriquez, kende a keda encarga awor cu e parti militar di e Formacion Social, na

inicio no a kere cu e programa aki lo bay funciona. Sinembargo, awe e por bisa cu e ta cumpliendo cu su meta. Esaki

el a duna di conoce na momento cu e participantenan di e di 7 Grupo di Formacion Social a pasa nan prome tres

siman leu di cas cu exito.

Diabierna, 30 di Januari ultimo e prome grupo di Formacion Social cu ta bou guia di Henriquez, a haya permiso pa

bandona Marinierskazerne. Pa e ocasion aki, ta invita mayor y famia di e cursistanan pa acudi na un ceremonia

durante cual e hobennan ta demostra kico nan a siña den e periodo di tres siman na Kazerne.
E grupo cu a keda despues di tres siman, Henriquez a bisa, ta hopi motiva. “Mi sa cu nan por finaliza e programa.

Door di e tres siman cu nan a caba di pasa aden, cu ta basta fuerte fisica- y mentalmente, e hobennan a demostra cu

nan mes kier cambia. Nos no por haci tur cos pa nan, y nan a demostra cu nan tin den nan loke ta necesario pa
finaliza e parti militar.” El a agrega cu mayornan ta hunga un rol grandi pa sigui motiva e hobennan durante henter e
trayecto di Formacion Social. “Mayornan mester sostene y sinti nan mes orguyoso di nan yiunan asina nan ta haya
mas gana di finaliza e programa y drecha nan bida.”

Teniente Henriquez ta forma parti pa algun aña caba di AruMil na Marinierskazerne, incluso ora cu e programa aki a
wordo introduci na 2011. “Prome mi tabata un tiki skeptico di e proyecto ora cu nan a introduci’e, pero cu e

gruponan cu a finaliza, bo ta wak e resultado final. E hobennan cu ta haya nan certificado na final, ta hobennan cu a

cambia y ta mustra e gana di kier logra algo den bida. Nan tin mas confianza den nan mes y mas disciplina. Tin ta
cay afo y kier bay cas y na nan bida bieu, pero despues ta arepenti. Nan ta mira cu no tin nada ey’fo pa nan y hopi ta
bolbe purba den SVT. E ora nan ta bin cu mas motivacion y ta cab’e.”