Page 42 - MIN ARENDS

Den presencia di prensa, ehecutivonan di Setar, OBID y colega di Asuntonan Economico,

Richard Arends, Prome Minister Mike Eman a haci dialuna mainta anuncio di e

lansamento oficial di WiFi den Caya G.F. Betico Croes. “Awe ta un dia hopi importante

pa desaroyo nobo di Caya Grandi,” Premier Eman a bisa.

Pa medio di e servicio nobo aki, peatonnan den e areanan di caya principal caminda e

wifi aki ta operacional caba, ta haya acceso gratis na WiFi. Dos di e tres fasenan ya ta den

funcionamento. E prome ta bay for di Plasa Daniel Leo te na skina di Aldo Shoes y e di

dos ta cubri henter e area rond di Burger King te cu Plasa Nikki Habibe. Pronto e di tres

fase, cu ta cera e espacio mey mey, tambe lo ta cla.

Prome Minister Eman a gradici publicamente e cooperacion di Setar N.V. y specialmente

e sosten di Ahmid Juddan y Suzy Maduro cu, for di prome momento cu a haci e peticion

na e compania di telecomunicacion, a kere y duna tur di nan parti pa e proyecto ta un

exito. Tambe mester gradici oficina di Oranjestad Business Improvement District y Sr.

Stanley de Marchena cu ta pusha e trabounan pa Caya Grandi. Por ultimo, no por laga afo

un danki na propietarionan di tienda y edificionan Caya G.F. Betico Croes cu, sin nan

aporte, e proyecto no lo tabata un realidad.

“Nos ta spera cu e proyecto aki ta bay yuda aumenta trafico den Caya Grandi,

specialmente di hobennan cu hopi bes kier tin e comunicacion directo ey y continuo.

Esaki sigur ta un ‘asset’ pa locual Caya Grandi tin pa ofrece,” asina Premier Mike Eman

a bisa. Tambe a menciona cu pa loke ta futuro di Caya Grandi, su gabinete ta hopi

positivo. “Nos tin un infrastructura fisico totalmente nobo, nos tin tambe un infrastructura

tecnologico den desaroyo y tambe un vision cla di unda e oportunidadnan nobo pa Caya

Grandi ta.”