Page 21 - Solo di Pueblo Aug 10

Dialuna 10 Augustus 2015 Pagina 21

Solo di Pueblo... Noticia Local.....

Reunion urgente entre FTA y Minister Paul Croes
ayera diadomingo

Minister di Labor drs. Paul Croes a reuni diadomingo
anochi Hubert Dirks Presidente di FTA y algun
trahador di Rui Cool Casino pa e situacion cu a presenta
eynan. E reunion a tuma lugar na bestuurskantoor. Sr.
Hubert Dirks a mustra riba e inquietud di e trahadornan
y e malcontento cu tin entre e gerencia y e trahadornan.
Trahadornan a bin ta haya maltrato di parti di
gerencia na momento cu nan a bira miembro di
sindicato. Trahadornan cu a afilia na sindicato
y cu a sali protesta riba diferente inquietud awor a
wordo suspendi sin ningun motibo. Minister Paul Croes
a informa e trahadornan cu lo pone atencion specifico
riba e caso aki di parti di su departamento di Labor.
Lo averigua motibo di e suspension di e trahadornan
y lo informa gerencia si esaki ta valido. Tambe
Departamento di Labor lo reuni cu Gerencia di Cool
Casino pa scucha nan banda di medaya y asina
trata na restablece pas laboral. Esaki sigur no ta un
situacion sano pa e casino y pa e trahadornan cu ta
sinti cu nan derechonan ta wordo trapa pa gerencia di
e casino.

Rayanne Berry:

Bullying ta kita bo

concentracion y cos

por bay malo

Un di e hobennan cu lo participa den e obra teatral "Stop
Bullying", cu lo tuma lugar dia 20 di Augustus den Cas di
Cultura, ta Rayanne Berry, kende ta splica su rol den e
obra aki. Berry tin e papel cu e tin, pasobra e kier mustra
muchanan aya fo, con dificil e ta pa abo mes cu ta tenta
hende, tambe mester di ayudo, no e victima so. Den su
papel, su mayornan ta tenta Berry, nan ta bis’e cu e ta kens
y ta keda cun’e y e ora ey e lo bash’e riba un otro mas swak’
cun’e. E victima ta wordo maltrata pa su mama. Su mama
no tin tempo pe. Asina Kaycee ta kere tur loke su mama ta
bis’e y eynan e ta keda pensa negativo di dje mes, door cu
su mama a bis’e esey.

Rachel su mama y su tata tambe no tin echt tempo pe, pero
toch e ta kere den su mes y e ta yuda otro cu tin momentonan
dificil pa nan por trece un solucion. Hendenan ta kere cu no
tin solucion pa bullying pero tin solucion p’e. Pesey Bery ta
kere cu bullying ta malo, pasobra e ta dificil. E mes cu a
wordo tenta den basis y mas despues den bida. E ta haya ta
dificil y fastioso pasobra maske bo ta un mucha sabi, bullying
por kita bo concentracion y cos por bay malo.

Den e obra Berry kier mustra con fuerte y con dolor bo por
haci un otro. Berry no kier pensa hopi riba dje pasobra e ta
trece tristesa cune. E ta keda cu un mente positivo y sigui
pa su futuro.

Berry ta recomenda un y tur bin, laga e muchanan bin mira
e obra y participa den un obra. Si e muchanan gusta actua
manera Berry, por haci su soño realidad y e mayornan
tambe pa nan paga hopi atencion na e obra aki, pasobra cu
mil amor esaki ta wordo presenta. Pa e mayornan tambe por
haya sa con dificil bullying ta y e muchanan mes cu ta bully y
victima di bully, cu tin un solucion p’e y mester djis kere den
nan mes y haci’e.