Page 43 - MIN TTC 9 APRIL 2016

Rene Herde':MEP no ta interesa den e berdad

Friday, 08 April 2016 12:34
Comparti

Den e reunion cu e fraccion di AVP a yama den Parlamento y cu a wordo transmiti pa henter pueblo wak
y tende, a resulta atrobe cu e partido MEP no ta interesa den haya sa kico ta berdad. E reunion a wordo
yama door di AVP pa trata preguntanan rond di e forma cu ATA (oficina di turismo) ta cumpra servicio y
duna contract pa duna servicio na ATA.

E fraccion di AVP a haci cinco pregunta concreto over di e forma cu a haci e destaho publico pa usa e logo
di ATA. AVP a puntra ken a haci e destaho publico. Ken a gana e destaho publico. Ken of cua
companianan tin e derecho pa usa e logo. Tambe a puntra e minister pa splica cuanto biaha ATA a usa
"bannernan" pa colga na palo di bandera y cua ta e companianan cu a haya e contract pa haci esaki. E
minister a duna contesta extenso riba tur pregunta. Ela contesta mas cu a puntra y ela duna
documentonan, contractnan y otro informacion scirbi pa basa su contestanan. For di e contestanan di e
minister y di e documentonan por conclui cu tur destaho publico a bay segun regla. No tabata tin niun
caso di preveligia niun compania. E rol di e minister tabata limita na acorda loke ambtenaarnan di ATA a
propone.

REDO Y INSINUACION

For di siman pasa ta circula acusacionnan di entre otro e fraccion di MEP, cu lo tin cosnan irregular ta
tuma luga. Entre otro tocante di e permiso pa usa y reproduci e logo di promocion di ARUBA. Den e
reunion di awetardi a resulta cu tur loke MEP ta acusa e minister y ATA didje no tin niun base. Tabata cla
den e reunion awetardi cu MEP no tabata interesa den haya sa e berdad. For di comienso di e reunion
nan tabata interumpi e minister y purba stroba e reunion. Obviamente nan comportacion ta mustra cu
nan no tabata interesa pa haya sa e berdad, pasobra e berdad ta stroba nan di sigui lansa rumor,
insinuacion, redashi y instigacion contra di e minister y di ATA. Ta esey ta e forma cu MEP ta traha! Pa
colmo ta dos miembro di e fraccion di MEP so tabata presente den e reunion. Ta asina importante e
asunto aki ta pa nan. Pafor di parlamento riba facebook si MEP ta lansa tur sorto di acusacion falso. E
lider di MEP a hasta entrega keho na Ministerio Publico. Pero e lider di MEP mes no a bini e reunion pa
cuestiona e minister y haya sa e berdad. Atrobe MEP a mustra nan cara real: tira piedra y sconde man!

TRANSPARENCIA

Fraccion di AVP a yama e reunion a corto plazo pa haci e minister preguntanan specifico y directo riba
entre otro e acusacionnan di MEP, pasobra Parlamento bou tur condicion mester sa kico ta berdad. Nos
comunidad tambe semper mester sa kico ta sosode den su pais. Ta pesey e transparencia cu AVP ta exigi
ta wordo duna tambe door di yama e minister y laga transmiti e reunion "bibo y directo" pa tur hende na
Aruba por wak y tende. Pero pa MEP esaki tampoco no ta bon. Pa MEP a yama e reunion pa tapa e
berdad. Ta conta haci esey si tur hende por wak y scucha tur cos cu ta wordo puntra y contesta. Ora MEP
pidi informacion of yama un reunion ta pa transparencia. Pero ora otro yama reunion esey ta pa tapa cos.