Page 26 - MIN JUS

GOBERNADOR BOEKHOUDT A HONRA 3
EMPLEADO DI KIA CU “0” AO

April 11, 2017 adminarubanative Uncategorized Leave a comment

ORANJESTAD, Aruba – Diabierna mainta Gobernador Alfonso Boekhoudt a haci
un bishita di cortesia na Korrectie Instituut Aruba pa un recorido na e instituto y
pa cera conoci cu nan tareanan diario.

Durante e ‘rondleiding’ Gobernador a haya oportunidad pa conoce e ‘meldkamer’,
departamento di castigo y e tayer. Tambe Gobernador a haya oportunidad di
presencia parti cortico di e les cu e hobennan tabata haya na KIA. Cu
colaboracion Universidad di Amsterdam y Orthopedagoisch Centrum e hobennan
ta sigui curso di habilidad social.

Gobernador Boekhoudt a haya un presentacion di e plan di maneho di KIA.
Directiva di KIA a elabora riba e siguridad interno, cuido di detenido,
infrastructura y e reorganisacion di KIA. Segun maneho di personal cu KIA ta
hibando, tres empleado cu no a “meld ziek” aña pasa a haya un regalo for di
leiding.

Directiva di KIA a haci un peticion na Gobernador si e tabata dispuesto pa
entrega e regalonan durante su bishita na KIA. Gobernador Boekhoudt a bay di
acuerdo y a entrega e regalonan na Wayne Beyde, Sydney Spanner y Leticia
Heyliger pa nan bon trabou, di percura pa hiba un bida saludabel, sin cu a bira
malo henter un aña y consecuentemente no a bay AO ni un solo biaha.

Korrectie Instituut Aruba, KIA a muda pa su localidad na Santo di Patia na San
Nicolas dia 22 di september 1990, pues 26 aña pasa. E prizon tin un populacion
di un maximo di 200 detenido, parti den detencion preventivo, seccion di hende
muhe y seccion di hubentud. Na KIA tin mas o menos 180 empleado trahando 24
ora pa dia pa garantisa siguridad y atende cu e presonan den cuadro di e
periodo cu nan mester sinta nan castigo cu e meta pa coregi nan erornan y sali
atrobe como miho ciudadanonan pa nos pais.