Page 61 - AVP

Lider Di Fraccion Di POR, Dellanire Maduro :

Gobierno Anterior Por A Drecha Loke Tabata Bayendo

Robes, Pero No A Haci Esaki

 Local
- 13/02/2020

Lider di fraccion di POR, Dellanire Maduro den su disertacion den sala di Parlamento
durante tratamento di e raport di Contraloria General ‘Bo Aruba’, a mustra cu ta
desapuntante pa mira con Gobierno anterior na diferente momento por a tuma accion pa
drecha loke tabata bayendo robes, pero esaki no a wordo haci.

“Mi ta desapunta di a mira cu tabatin varios momento cu por a controla, cu por a tuma
accion y esaki no no a tuma lugar. Solamente den e prome 15 paginanan di e documento
bo ta keda spanta, pasobra constantemente ta bisa no tin esaki, falta esaki, no tabatin
transparencia, no a cumpli cu leynan di contabilidad, entre otro”, e ta bisa.

Dellanire Maduro a splica tambe cu e raport ta papia di diferente riesgo cu e proyectonan
aki a trece pa pais Aruba y cu ta tristo cu mayoria di e proyectonan aki no por garantisa
durabilidad, tabatin falta di claridad riba e ‘projectdossier’, no tin indicadornan pa midi,
no tin evaluacionnan final, no a tene cuenta cu aspectonan di mantencion cu esaki ta trece
cune cu mester bolbe inverti.

Den e raport ‘Bo Aruba’ ta papia tambe di falta di transparencia den 8 caso specifico cu
no a realisa destaho publico sin cu a presenta e rason atrabes di un decreto ministerial.

Lider di fraccion di POR tambe tabatin algun pregunta p’e mandatarionan presente. Den e
cuentanan anual di pais Aruba cua aña Departamento di Finansa a cuminsa duna
informacion di e proyectonan PPP? A siña di loke a pasa y nos ta prepara pa atende cu
situacionnan asina den futuro?