Page 14 - MIN ON

MIREILLE SINT JAGO (MEP): “MEP LO
PERCURA PA TUR MUCHA GUSTA LESA
BUKI NA PAPIAMENTO!”

April 11, 2017 adminarubanative Uncategorized Leave a comment

Un di e problemanan den enseñansa ta e idioma Hulandes. Sea e mucha ta
wordo confronta cu esaki como idioma di instruccion den klas 1 basis, klas 5
basis, na EPB, MAVO HAVO VWO etc. Un cos ta sigur… E ta un situacion
abnormal cu no ta trece e resultadonan desea. Ora nos papia cu na Aruba no tin
un cultura di lesa, nos semper ta bisa cu esey no ta e CAUSA pero e RESULTADO
di mantene un sistema di educacion cu no ta sirbi ni cuadra cu esnan cu ta haci
uzo di dje.Pa lesa buki y gusta e storianan, e mucha of hoben cu ta lesa mester
compronde kico e ta lesa. Cu e informacion ey e ta traha imagennan den su
cabes. E pelicula aki ta bin acompaña di emocionnan y henter e experiencia aki
ta crea un sentimento unico pa cu e buki cu ta wordo lesa. Asina e mucha ta
haya un experiencia positivo cu ta smaak na mas. E nivel di AVI-lezen cu un
mucha tin, no ta bisa nada di e nivel di comprension di e idioma Hulandes. Ta
solamente un habilidad tecnico cu ta wordo logra. Nos lo mester traha mas riba
vocabulario y ofrece ayudo na Papiamento online. E lenga materno eigenlijk ta e
idioma pa cuminsa cun’e na scol. Esaki lo mester core di e prome dia di scol te
na e edad di 15 aña. Manera e hoben por expresa su mes den su propio lenga
materno… E lo ta capacita pa traduci, debati y conversa riba un nivel mas halto.
Un dicho conoci ta: “You cannot think deeper than your vocabulary allows you
to.” Tanten cu nos no siña nos yiunan pa debati, lesa y skirbi na Papiamento,
nan lo keda atras y lo no tin hopi oportunidad pa discuti of argumenta riba un
topico specifico. Ta pesey mi ta sigur cu Enseñansa lo bira hopi mas miho cu nos
den MEP, miho cu Mireille. Nos lo percura pa tur mucha gusta lesa door di amplia
e oferta pa nos muchanan na Papiamento. Ya caba nos tin e proyecto Scol
Multilingual cu ta uno exitoso, aunque Gobierno no a sigui evalua y stimula
e proyecto aki. Cu MEP cada mucha lo siña compronde tur locual e ta lesa! Pa
nos soluciona un problema asina grandi y impactante riba nos comunidad, e ta
necesario pa nos tur bay hunto p’e cambio!!
Un pueblo consciente, esey ta nos prioridad! Futuro generacionnan cu por lesa,
compronde y expresa nan mes bon… Esey nos mester: Mandatarionan cu ta
scucha e deseonan y dolor di e educadornan y henter comunidad!