Page 12 - AM210410

12 AWEMainta Diabierna, 10 April 2021

Un coleccion nobo na Cosecha

conhuntamente cu artista Erika Moran

NA un forma diferente Cosecha a lansa un coleccion nobo cu
colaboracion di Erika Moran. Esaki por a ser mira diarazon
anochi “live” riba facebook na unda cu e team di Cosecha a

splica mas di e coleccion aki.
E coleccion ta uno cu sigur ta capta atencion dor di e colornan
yamativo cu e artista ta conoci pe. P’e coleccion aki Erika a
focus entre otro riba nos fauna, p.e. e turtuga y shoco cu e ta

conoci pe no por a keda afor.

Erika Moran mes no ta un artista desconoci na Aruba. El
a studia “fine arts” na Colombia y e ta considera su mes

un artista contemporaneo y p’esey mes e ta gusta traha cu
color. E ta wordo inspira e.o. door di su emocionan cu e ta
translada den un explosion di color usando acyrlic of verf di
azeta.

E coleccion di Cosecha ta consisti primeramente di “tote
bags” cu pinturanan di Erika riba dje. Esakinan por usa
p.e. como un piesa di moda, pero tambe pa haci compras,

bay lama, pa pone articulonan di scol aden etc. E coleccion
tambe ta consisti di pinturanan riba boter antiek di biña cu
por wordo usa como piesanan decorativo.
Cu e diseño cu Erika a crea, e kier a duna homenahe na fauna

en general y cu par di piesanan dedica na esun di Aruba.
Naturalesa cu tur su colornan y cu tur su especie ta inspire
den hopi di su pinturanan y p’esey Erika kier mustra publico
un biaha mas con bunita nos naturalesa ta.

Cu e proyecto aki, Cosecha ta crea posibilidadnan nobo pa
traha hunto cu e artistanan local di Aruba. Cosecha kier no
solamente duna aporte door di stimula artista local pa traha

piesanan nobo, pero tambe door di crea trabou extra pa nan
den e periodo di pandemia.