Page 13 - MINISTER MIKE DE MEZA

DOW: E tema di hopi auto na Aruba tin su atencion

on: April 12, 2016In: LocalNo Comments
Print Email

Berdad Aruba no lo bay crece pero cu e camindanan nobo manera Green Corridor y Watty Vos
Boulevard, lo yuda pa baha e volumen di auto cu ta keda core riba un solo caminda segun director
di DOW Marlon Croes.

Segun ultimo calculo, tin un populacion di auto, inclusivo ekiponan pisa, di alrededor di 70 mil
vehiculo. Esey ta nifica cu tin un autobezit per capita hopi halto y esey ta trece cune cu nos tin hopi
trafico ta move riba nos isla. Mas auto cu tin, mas trafico ta crea y esey ta trece algun punto di
congestion riba nos red di caretera.

Bisando esey, manera cu Croes a yega di menciona, ta bezig cu Green Corridor y ta bezig tambe cu
e financial close di Watty Vos Boulevard, cu si tur cos bay bon pa logra esaki, lo cuminsa cu
construccion den luna di Juni/Juli. Esakinan ta pa yuda baha e congestion riba nos red di caretera
door di reloca trafico pa e careteranan aki pa transporte di punto A pa punto B, manera San Nicolas
pa area di Hotel, caminda cu tin un populacion di hendenan di San Nicolas cu ta traha den area di
hotel. Ta brindanan un oportunidad pa no pega den fila y haci nan tempo di core di punto A pa punto
B mas cortico y asina nan por gosa di un miho tempo liber, segun Croes.

Croes a comenta cu den pasado a propone algo pa baha fluho di auto, pero pa awor aki ta kere cu e
construccion di Green Corridor y Watty Vos boulevard y algun cambio den infrastructura, lo por deal
cu e fluho di trafico, pero e ta algo cu tin cu bay discuti den un forma mas amplio, no ta di DOW so,
pero cu Cuerpo Policial y tur e gremionan na Aruba, e stakeholdernan pa por bay discuti kico kier cu
Aruba. Kier pa Aruba sigui crece den cantidad di auto of ta bisa cu ta bay limita importacion di auto.
Tin diferente interes. Tin pro’s y con’s cu tin cu bay evalua prome cu yega na un decision asina,
segun Croes.