Page 48 - AWEMAINTA
P. 48
48 AWEMainta Dialuna, 23 April 2018
Corsou
CITRO
a rescata 7 turista sambuyado y 3 tripulante
WILLEMSTAD - Diasabra, 21 april ultimo
CITRO a haña notificacion, atrabes di
Guardacosta 913, cu tabatin un yate di motor
di mas o ménos 30 pia cu problema na altura di
Oostpunt cu 3 persona abordo.
Ademas di datonan aki, Guardacosta no tabatin
mas informacion, solamente cu e yate ya a dal
riba baranca òf cu e tabata na punto di subi
baranca.
Mesora CITRO a bati alarma pa su
boluntarionan. Sigur tambe pasobra ya tabata
casi 4.or y pronto lo a bira scur. Kiermen mester
a drenta den accion mas lihé posibel.
Pa 4.30 C-Rescue 1 tabata riba laman, direccion
di Oostpunt. Tambe e Dash di Guardacosta a
sali pa tira un bista kico tabata e situacion. Nan
a constatá cu tabatin 3 persona riba tera.
Ora C-Rescue 1 a yega awa di Oostpunt, nan
por a constatá cu e yate a haña su mes den
problema pa motibo cu e motor a stòp di traha.
A logra tira anker djies bou di costa. Pa nan
mala suerte e boto a lòs for di e anker y tabata
na punto di subi tera.
Boluntarionan di CITRO a topa cu 7 sambuyadó
cu a landa bay tera y 3 tripulante cu keto bay
tabata riba e yate. Tur e sambuyadónan tabata
turista.
Ya como cu e sambuyadónan tabata safe na
canto, boluntarionan di CITRO a dicidí pa
promé hala e yate bay afó cuné y asina evitá cu
e ta bati kibra riba baranca.
E boto di piscadó Myron tabata den becindario
y a yuda tene e yate un rato pa duna CITRO
chèns pa bay busca e 7 turistanan sambuyadó
na canto cu nan ekipo y trece nan abordo di
C-Rescue 1. Despues a tuma e tou bèk for di e
boto di piscadó Myron.
Pa 6.30 di atardi C-Rescue 1 a tuma ruta atrobe
pa Caracasbaai cu e 7 turistanan na bordo.
Enbes di un atardi placentero, sambuyando
costa oost di Còrsou, e turistanan aki a pasa
den un scual grandi.
CITRO ta contentu cu tambe e por a scapa e
yate di a bati kibra riba barancanan di Oostpunt.
Pa 8.30, boluntarionan di CITRO a sera e
diasabra atardi aki un biaha mas cu un accion
exitoso, caminda atrobe a keda demostrá cu e
organisacion aki ta di balor crucial pa scapa
bida di hende riba laman.
