Page 15 - AGF July 2 & 1 2015

A presenta un periodo un poco dificil ora cu tabata aparenta cu RIU lo a bira doño di La Grande Dame,
manera e edificio tabata conoci. Afortunadamente, a resolve e asunto aki y Aruba Growth Fund ta gradici
comunidad di Aruba, Gobierno y Minister Otmar Oduber, Aruba Gastronomic Association, Aruba
Tourism Authority y tur otro cu a contribui pa un final satisfactorio.
No tur negociacion ta bay facil, pero a logra resolve esun aki y Aruba Growth Fund ta mira padilanti, pa
un periodo positivo, productivo y prospero pa Aruba Caribbean Hotel cu e luna aki caba lo wordo
“reflagged” como Hilton Aruba Caribbean Resort & Casino
“Nos mester ta contento como Arubiano cu e benta a bay door”, asina Rene Kan a bisa. El a añadi cu ta
un oportunidad excelente pa Aruba pa yama bonbini na e cadena global Hilton Resorts & Hotels, funda
na 1919 pa Conrad Hilton y cu tin 540 hotel y resort den 78 pais den seis diferente continente.
Hilton, cu ta doño di e prestigioso Waldorf Astoria y otro “brands” manera Conrad, Canopy y Curio
Collection, pero tambe Double Tree, Embassy Suites y Hampton Inn ta e cadena di hotel cu ta presente
den mas pais cu cualkier otro cadena den e categoria di “full-service hotel brand”.
Rene Kan a agrega cu for di dia 15 di juli Aruba Growth Fund lo tuma e hotel over y tin plannan pa
renobacionnan extenso cu lo cuminsa y lo completa na aña 2016 y pa futuro tin proyecta pa expande e
hotel, añadiendo mas un edificio adicional cu mas camber.
E inversionista tin recuerdonan bunita di e hotel aki cu e tabata bishita for di tempo cu e tabata mucha,
hunto cu su wela y for di e tempo ey a sigui semper ta bishita e hotel cu a cambia varios biaha di “flag”,
pero a keda e mesun Caribbean Hotel y Grande Dame pa nos comunidad.
E ta expresa cu e ta contento cu particularmente e sosten di e empleadonan di e hotel y cu esaki ta algo cu
e partnernan di Aruba Growth Fund a aprecia hopi, como cu tin personanan cu algun decada di servicio y
hopi experiencia den e industria cu conoce e mes personalmente pa hopi aña tambe.
“Nos por ta orguyoso di tin Hilton aki na Aruba,” asina Rene Kan a finalisa bisando.
E hotel ta construi desde aña 1959 y tabata e prome hotel “Full Service Luxury Resort” situa riba Palm,
Beach. E tin 355 camber, parti den tres edificio. E servicionan di e hotel ta varia den un SPA, Fitness
Center, ballroom espacioso, casino, 5 restaurant y bar, dos swimming pool, Business Center y un beach
masha grandi su dilanti. Nan tin mas o menos 450 empleado den servicio directo mas 75 empleado
trahando eyden via otro companianan.