Page 18 - FLPD

Eli a nace riba un 16 di februari na aña 1960. Na un edad hopi jong caba el a cuminsa
hunga practica deporte cu su amigonan riba un pida tereno den e bario di Keito. E
deportenan tabata futbol na comienzo y despues a pasa pa hunga softball tambe.

E pida tereno despues di tempo a cuminsa bira chikito y e grupo a sigui hunga riba un pida
tereno unda antes ta awor e restaurant Different. Despues cu e tereno aki tambe a cuminsa
bira chikito, ya cu e edadnan a sigui subi, a pidi ayudo di un instancia pa rosa un pida
tereno unda awor e caminda di Sasaki ta pasa, esta net pabou di e cura di Different.

Riba e tereno aki Eli a sigui hunga softball. Eli a hunga contra varios team di barionan den
vecindario, esta e teamnan di Palm Beach/Monserat, Koyari etc.

Ariba un dia Eli a dicidi di bay train cu e equipo di Palm Beach cual tabata train riba e tereno
di futbol di Dep. Nacional. Eynan el a haya un oportunidad pa drenta den e equipo di Palm
Beach Stars cual despues a bira Monserat Pirates. E equipo a traha duro pa yega na un
tereno pa train. Esaki a resulta e tereno unda awor ta Hose Maria Ball Park na Monserat.

E equipo di Monserat Pirates a organiza algun torneo riba e tereno aki, den cual equiponan
di Noord tabata participa.

Na aña 1979 pa 1980 e equipo a disolve y Eli a haya oportunidad pa join e equipo di North
Eagle Stars. Cu North Eagle Stars, Eli a haci diferente biahe pa exterior: Bonaire, Costa
Rica, Ecuador, Republica Dominicana, Venezuela, sea pa hunga of como miembro.

Eli a forma parti tambe di e directiva di North Eagle Stars, sea como comisario, tesorero y
presidente y tambe manager di e equipo.

Na aña 2000 North Eagle Stars a organisa Copa Noord y na 2001, Eli a trece e idea dilanti
pa organisa un torneo den cual tur e barionan di Noord ta representa den dicho torneo.

E idea aki a cay den bon tera serca e directiva di North Eagle Stars, y asina Copa di Bario
Noord a cuminsa. Copa di Bario Noord a cuminsa riba Centro di Bario Noord Ballpark y
despues cu North Eagle Stars a haya e tereno na Monserat pa usa, e torneo aki a sigui riba
tereno aki cu a haya e number di Hose Maria Ballpark, dedica na Hose Maria Christiaans,
d.f. m.

Desde 2001, tur aña a organiza Copa di Bario Noord te cu 2010. Na 2010 Eli a retira di e
organisacion di North Eagle Stars.

Sr. Mario Croes di e equipo di Warawara a acerca Eli pa forma parti di e equipo aki den Liga
50.