Page 42 - AHATA
P. 42
ORANJESTAD (AAN): Dos aña pasa, un grupo di inversionista a firma un acuerdo cu e
cadena hotelero internacional Marriott pa dia 1 di December 2019, entrega totalmente
cla e prome Courtyard by Marriott den Caribe y e di dos na mundo.
Asina a sosode. Dialuna 2 di December tabata tin un ceremonia special pa yama bonbini
na Courtyard by Marriott Aruba Resort unda antes tabata tin The Mill Resort.
Vicky Perez, Gerente General di e resort a expresa dilanti di mandatarionan,
parlamentario, inversionistanan di e grupo Alaimo, representantenan di Marriott,
contratistanan, empleadonan y un cantidad di invitadonan special cu e ta
completamente sigur cu e logro di e inauguracion aki ta un testimonio di loke por haci e
interesnan comparti, trabao den ekipo y un vision pa futuro.
El a agrega di ta hopi orguyoso cu Marriott a selecciona Aruba pa realiza e prome
Courtyard Resort di e region CALA (Latinoamerica y Caribe), un proyecto bandera.
Perez a gradici e inversionistanan, e grupo Alaimo, specialmente Dr. Carlos Alaimo, pa
a kere den Aruba y den e proyecto aki como den e talento local.
