Page 6 - ATA

2 MINS
POST VIEWS: 7

ORANJESTAD, Aruba

Durante e ceremonia di groundbreaking pa rotonde di Cumana den cuadro di proyecto ‘Watty Vos
Boulevard’, director di Aruba Tourism Authority (ATA), Ronella Tjin Asjoe Croes a hiba palabra
como representante di un sector grandi y representante di nos comunidad. E ehecutivo di turismo a

felicita tur esnan cu ta pone nan empeño, dedicacion y palabra di exito ya cu ta un proyecto asina
importante pa nos comunidad den su totalidad, pero sigur tambe pa e industria turistico.

Tjin Asjoe-Croes a splica cu e importancia ta sinta na e hecho cu ya caba cuater decada pasa a

premira un vision pa cu desaroyo turistico di nos pais y cu esaki lo rekeri un inversion den
infrastructura. Y mientras cu e proyecto a dura asina hopi pa logra, entretanto turismo si a sigui
crece. “Si nos wak bek apenas dies aña pasa, Aruba a ricibi un total di mas o menos 1.2 miyon

bishitante cu ta un combinacion di esnan cu ta keda mas cu un dia y esnan cu ta bishita cu barco.
Awendia nos ta papia di 1.8 miyon bishitante den su totalidad.”

Pa ATA y tur otro partner den turismo construccion di ‘Watty Vos Boulevard’ cu ta conecta no

solamente pariba y pabou di brug, pero tambe waf nobo di Barcadera cu area di Noord, aliviando
asina grandemente e fluho riba L.G. Smith Boulevard, ta un mehoracion pa e calidad di bida di esnan
cu ta biba akinan “incluyendo mi persona, pero tambe sigur ta un mehoracion esencial y necesario,
por bisa pa sigui sostene pero tambe pa mehora e experiencia di e bishitante,” e director di ATA a

bisa.

Tjin Asjoe-Croes a felicita Gabinete Mike Eman II como esnan cu a logra di haci e vision un realidad

reafirmando cu tur den industria turistico ta warda cu anhelo e realisacion di e proyecto aki pa nos tur
por gosa di su fruto tambe.