Page 32 - ATA

Locual cu a tuma lugar riba nos beachnan y cual video a wordo distribui riba Facebook ta
inacceptabel segun e mandatario. Como Minister encarga cu precario cu ta wordo otorga
pa operacion di actividadnan riba nos beachnan ta anuncia cu lo tin cero tolerancia pa e
tipo di actonan aki.

‘Mi tabatey na inicio di Beach Policy cu tambe ta cay bou di responsabilidad di Minister
di Infrastructura, sinembargo e tempo ey como Minister di Turismo mi a pone hopi
presion riba esaki. A base di e video cu a circula a mustra hopi cla, kico tur ta sosode riba
nos beachnan. Lamentablemente esaki no ta un incidente cu a tuma lugar e siman aki so.’

Oduber ta informa cu a yama un reunion pa diahuebs awor entre tur Minister envolvi
esta, Minister di Turismo, Minister di Transporte, Minister Oduber encarga cu
Infrastructura y departamentonan concerni manera KPA, Directie Scheepvaart, DIP y
DOW. Pa di e forma ey un biaha mas mustra cu ta sigui sostene e maneho cu tabatin di ‘3
strikes you’re out’. ‘Esaki mester ta bon conoci pasobra no ta prome biaha cu ta
mencione. E maneho aki ta conta pa tur hende cu ta opera riba e beachnan.’

E reunion ta pa delinea cu tur hende ta opera riba e mesun liña, y cu lo tin cero tolerancia
pa tipo di actividadnan aki riba beach. Den pasado e Minister di Infrastructura no a
percura pa DIP haya e apoderacion pa haci e controlnan mas severo, sinembargo esaki ta
inicia inmediatamente y DIP ya a wordo informa di esaki caba. Pa cuminsa e dos
personanan en cuestion lo haya advertencia, sin considera ken tabata robes, e ta bay pa e
hecho di locual cu a tuma luga. Pasobra si tin algo cu ta bay robes, tin instancianan cual
por acudi pa yega na solucion. Insulto, agregcion y publicidad negativo cu esaki ta duna
nos Pais ta inaceptable y ta un atentado directo contra e bienestar economico di Pais
Aruba, Oduber a bisa. Pa conclui Oduber a sigura cu KPA tin registracion di tur e
advertencianan cu a wordo entrega y lo sigui haci esaki.