Page 40 - MIN ON 23 JUNE 2017

Acuerdo firma cu Carleton University ta uno positivo

Thursday, 22 June 2017 18:57
Comparti

Recientemente Minister di Enseñansa a firma un acuerdo cu Carleton University di Canada. E acuerdo aki agrega un
scol mas na e lista di acuerdo cu Aruba tin formalisa cu institutonan di enseñansa superior na Merca y Canada.
Minister di Enseñansa y Famia, Michelle Hooyboer-Winklaar ta contento cu nan por a finalisa e acuerdo aki.

Carleton University ta hopi renombra y conoci rond mundo y ta situa den e capital di Canada, esta Ottawa.

E universidad aki ta ofrece diferente programa riba diferente tipo di area. E universidad tin un imagen y reputacion
hopi positivo na Canada y ta conoci como Canada su “Capital University”. “Pa nos sigur e ta un logro grandi. Nos
acuerdo ta encera diferente beneficio pa nos studiantenan”, asina Minister Hooyboer-Winklaar a enfatisa. E parti di
beca cu studiantenan di Aruba por bin na remarca pe ta varia entre 1 mil pa 4 mil dollar Canades pa aña y esaki ta
depende di cierto rekisitonan manera resultadonan di scol secundario. Aki ta unda cu Ministerio di Enseñansa
conhuntamente cu Carleton University pronto lo duna mas informacion na cada studiante cu ta interesa den e
opcion aki por medio di un practical guide via di e website di Departamento di Enseñansa.

Ministerio di Enseñansa ta trahando actualmente conhuntamente cu e institucionnan Canades pa asina nan por
evalua y reconoce nos sistema educacional un tiki mas miho pa asina por evalua e studiante di Aruba na un manera
hopi mas husto y faborabel pa e studiante. Esey ta loke Ministerio di Enseñansa ta boga pe y hunto cu e aspecto
financiero, den e caso aki un beca cu lo ta aplicabel pa studiantenan di Aruba.

Recientemente Ministerio di Enseñansa anuncia tur e cambio cu a wordo formalisa pa loke ta Arubalening,
specialmente e ahustacionnan riba e pakete pa esnan interesa pa studia na Merca of Canada cu ta haci e opcionnan
aki mas accesibel. “Esey pa nos ta algo hopi importante, pasobra nos por crea e opcionnan pero si e studiante no por
yega na dje e no tin balor agrega”, Minister Hooyboer-Winklaar a expresa. Pa Ministerio di Enseñansa e diferente
factornan aki hunto ta contribui cu studia na Merca of Canada awo ta un opcion real cu studiantenan por considera.
Carleton University a indica di a ricibi algun aplicacion caba pa e aña academico benidero. Esaki tin di haber cu e
hecho cu e universidad tabata presente pa prome biaha na Aruba durante di e College Fair na november ultimo.
Minister Hooyboer-Winklaar ta hopi contento cu a logra crea un opcion mas pa nos studiantenan di Aruba y ta
entusiasma pa e oportunidadnan cu e opcion nobo aki lo trece pa nos hobennan.